Shillong, Naitung, 05: Hadien ka jingbteng jong ki Karbi ban thombor ïa ki Pnar jong ka shnong Khanduli, West Jaiñtia Hills District kiba leit rep kba, rep soh ha ki thaiñ Khappud bad kiba khang ïa ki Pnar ban mih na khanduli ban rung sha ki jaka bashong basah da ki Karbi ka Khasi Students Union, Namdong Unit ka la talasi naphang ïa ki kali kamai bad ïa ki kali jong ki riewshimet ban khanglad ïa ki Karbi kiba leit iew sha ka shnong Khanduli.
Ka Seng ha u kyrwoh ba la phah sha ki lad pathai khubor ha ka sngi Balang ka la pynpaw ba kane ka jingtalasi ïa ki kali ka dei namar ka jingshah leh donbor jong ki Pnar ha ki Karbi ha kine ki khyndiat por ba la leit noh.
Ka Seng ka kyntu ruh ïa baroh ki nongshong shnong jong ka thaiñ bad ïa baroh ki Waheh Shnong ba kin ïasnohkti lang bad ka Seng ban ym ailad ïa ka jingmih jingrung bad ban khaii pateng bad ki Karbi tad haduh ba ka jingsuk kan wan hapdeng ki Karbi bad ka shnong Khanduli.
Ka Seng ka la maham ruh ba lada don kiba ïaleh pyrshah kin hap shim hi ka jingkitkhlieh. “Na ka liang jong ka Seng kan ïai don ha syndah bad ka shnong Khanduli khamtam haba ki mad kum kine ki jingeh,” la ong u kyrwoh.
