Shillong, Naitung, 05: Ka Khasi Students Union (KSU) Laban Circle ha ka sngi balang ka la aiti da ka dorkhas ha u Divisional Forest Officer (DFO) ka East Khasi Hills halor ka jingsah be-aiñ ki bar jylla ha Mahadev Khola.
Ha u kyrwoh ba la phah sha ki lad pathai khubor, ka seng ka la pynpaw ba katkum ka jingwad bniah jong ka Seng la lap ba ka Forest Department ka la ai jaka sha ki riewngeit Hindu ban shna ïa ka Mandir ha Mahadev Khola ha u snem 1923 bad ka jingai jaka ka long beit thik tang ban lehniam bad ym ban buhai shnong.
“Hynrei ha ka jingleit jurip na ka liang ka Seng la lap ba ki don haduh 30-40 tylli ki longiing kiba nabar jylla bad bun tylli ki dukan ki bar jylla ba sah khlem ki kot ki sla. Kaba kham ishyrkhei ïa kane ka jaka ka long ba ki Dorbar Shnong kim lah leh eiei namarba ka dei hapoh ka jingpeit ka Tnad Forest bad ki briew kiba nabar jylla ki ïoh ban rung ban mih katba mon khlem don kano kano ka jingpyrkhing,” ong u kyrwoh na ka Seng.
“Ki jaboh na ki thliew iing ruh la lap ba ki pyntuid beit sha ka wah bad ïa ka jaboh la shu bret pathar khlem ñiewkor ïa ka mei mariang. Kane ka jaka ka long kum kawei na ki ktem jong ki nongdih drok bad bun tylli ki jingjia shah tuh sha lute ki ju jia na ka por sha ka por,” la kynnoh ka seng. “Na ka liang u DFO u la pan por ba un leit jurip bad ban pynmih ïa ki briew kiba sah beaiñ,” la bynrap u kyrwoh.
