Jowai, Naitung 05: Hadien ka jingmih khubor ha kine ki khyndiat sngi halor ka jingshahkem jong u Jimmy halor ka jingdonkti ha ki kam khaïi drok, uba la kam ba u dei na ka kur Sutnga na ka liang jong ki nongïalam jong ka Seiñ Kur Sutnga 14 Khrong ka la leit ban ïakynduh ïa ki bahaïing hasem jong u Jimmy ha Jowai na ka bynta ban ïoh pynthikna ïa ka jingkam kur jong u kumba ula phla ha khmat ki Pulit kum u Jimmy Sutnga.
Ha kane ka jingïakynduh jong ki nongïalam Kur bad hadien ka jingtohkit kaba bniah na ki bahaïing hasem jong u Jimmy la lap ba u Jimmy u dei na ka kur Pdang ym na ka kur Sutnga.
Kumta ka Kur Sutnga ka la kyntu sha baroh ki paidbah ba ki dei ban pule kum u Jimmy Pdang ym kum u Jimmy Sutnga, ong u kyrwoh na u General Secretary ka Seiñ Kur Sutnga 14 Khrong, Jowai.
