Shillong, Naitung, 05: Ki nongïalam jong ka Hill Farmer Union (HFU) Pynursla Block ha ka sngi Balang ka la leit ban ïakynduh ïa ka Myntri ka Rep ka Riang ka Dr. Ampareen Lyngdoh ban pynsngew halor ka jinghiar dor jong ki marrep bad ka jingkiewdor jong ki marbam mardih kaba la ktah haduh katta katta ïa ki nongrep.
Ha ka jingïakren bad u President jong ka seng, u Bah Vishal Khongshei u la ïathuh ba ka jinghiar dor jong ki mar rep kum u synsar, ki soh bad ki jhur ka la ktah shikatdei eh ïa ki nongrep. Ha kajuh ka por ruh ki la kyntu ruh ïa ka Sorkar ban pynbha ïa ka iew kaba don ha khappud khnang ba ki nongrep na ka thaiñ Pynursla kin ïohlad ban pynïaid iew ïa ki mar rep ki jong ki.
U la ïathuh ruh ba na ka liang jong ka Myntri ka la kular ban shimkhia ïa ki mat ba ka seng ka la pynsngew ha kaba ka Myntri ka la buh sngi ha ka 10 tarik u Naitung, 2023 yn sa ïathir ïatai sani halor kane ka mat.
Katkum ka dorkhas ba ka seng ka la aiti sha ka Myntri ka la kyrpad ïa ka tnat ka Rep ka Riang ban pynkhie im biang ïa ka rep Sohñiamtra ha ka thaiñ Riwar, ban buh ïa ki karkhana thaw jingbam (Food Processing Industry) na ki jait soh bapher bapher kiba mih na ka thaiñ Riwar kum u Soh Phan, Soh Trun bad kiwei kiwei, ban ïarap pynsngew lem sha ka Sorkar ïa ki jingeh jong ki nongrep synsar namar ka jinghiar dor shaba palat haba ïanujor bad kiwei pat ki snem ba la leit noh, ban ïarap ïa ki nongrep ban pynïaid iew ïa ki mar rep kiba don ha khappud da kaba shna ïa ki iew kumba ka long ha ki por ba mynshwa.
