Shillong, Naitung 05: Ka Federation Riwar Mihngi Local Dorbar (FRMLD) mynta ka sngi ka la ïakynduh ïa u Myntri ka tnad Social Welfare bah Paul Lyngdoh bad dawa ïa ka Sorkar ba kan thaw noh da ka Village Task Force Committee (VTFC) na ka bynta ban pynkhlaiñ ïa ka jingïakhun pyrshah ïa u drok hapoh ka thaiñ Pynursla baroh kawei.
Haba kren sha ki lad pathai khubor u Publicity Secretary ka FRMLA bah Edmund Khongngai u la ong ba ha ka jingïakren bad u u Myntri ka tnat Social Welfare, na ka liang ka seng ka la pynpaw ïa ka jingsngewkhia halor ka jingïoh jingtip ba ka Pynursla ka dei kawei na ki ktem lane Hotspot ba jur ka jingdih bad khaïi drok.
U bah Edmund ula ïathuh ba ha kane ka jingïakynduh ki la pynpaw ha u Myntri ban buh noh ka Village Task Force Committee ka ban ïatreilang bad u SDO, BDO, kumjuh ka tnat Pulit bad ki nongshong shnong jong ka thaiñ na ka bynta ban ïakhun pyrshah ïa une u jingdih ba pynjot ïa ki khun samla ka dong ka thaiñ bad ka jylla baroh kawei.
“Ka jingdon ka Village Task Force Committee, ki Dorbar kin ïoh ka bor ban ïatreilang bad u SDO, BDO bad ki Pulit ban rat dyngkhong ïa u drok napoh ka thaiñ Pynursla bad haka juh ka por ka Committee kan pynlong ruh ïa ki kynja jingïalang ban pynshai paidbah lane Awareness Program ha ki skul, ki jaka pule, ha ki ïew ha ka thaiñ Pynursla khnang ba ki paidbah kin ïoh jingshai bad kin sngewthuh ïa ka jingma na ka jingdih ïa une u jingdih pynbuaid” ong u bah Edmund.
U bah Edmund ula pyntip ruh ba haka jingïakren bad u Myntri, ka FRMLD ka la kyntu ban buh noh da u Number Phone lane Toll Free Number na ka bynta ba ki riew paidbah ba kin lah ban phah jingtip sha ka tnad Social Welfare bad ruh sha ki Pulit haba ïadei bad u drok ha ka thaiñ Pynursla.
Ula ong ruh ba ka Dorbar ka la kyntu ïa u Myntri ban bthah ïa ki Pulit ba kin pynlong ïa ka jingtalasi ïa ki kali ba leh ïa ki kam khaïi sha Bangladesh namar ka lah ban long ba kine ki kali ki lah ban don bynta haka jingkhaïi ne wanrah drok shapoh ka thaiñ bad shapoh ka jylla.
