Shillong, Risaw 20: Ka Achik Conscious Holistically Integrated Krima (ACHIK) ka la thoh sha u Deputy Inspector General of Police (DIG) uba khmih ïa ka thaiñ Garo Hills da kaba kyntu ban khanglad ïa ki kam khaïi beaiñ, kum ka khaïi masi bad ka jingkhaïidrok.
Ha ka shithi, ka seng ka la ong ba ki don ka jingsngew khia ban ïohi ba ka don ka jingïakhaiï masi beaiñ sha Bangladesh bad ka don ka jingkhaïi drok ha ki bynta kiba ïajan bad ka jylla Meghalaya.
Kane ka jingkhaiï beaiñ kan ktah ïa ka shongsuk shongsaiñ bad ïa ka ïoh ka kot jong ki paidbah, ïa ki nongrep bad kumjuh ïa ki nongkhaiï bad ha kaba kut kan ktah ïa ki paidbah ha ka kamai kajih.
Ka seng ka ai jingmut ïa ki Pulit bad ïa ki shipai BSF ba kin ïatreilang ban khanglad ïa ki kam khaiï beaiñ sha Bangladesh, ban pynlong ïa ki jingpynshai paidbah ha ki shnong ha khappud bad ka ri ka don ka jingma na ka jingïakhaiï beaiñ.
Ka seng ka ong ba dei ban kham pynkhlaiñ shuh shuh ïa ka jingpahra ha khappud bad ka jingïatreilang ki pulit bad ki BSF ha khappud Bangladesh da ka jingïadonlang ki trai shnong kiba don ha khappud.
Ka seng ka la ong ba ki nongkhaiï beaiñ kin dei ban sangeh noh ïa ki kam khaiï beaiñ lada ban ai jingkyrshan ba kin seng noh da kiwei ki kam bad ban ïatreilang bad ki shnong ki thaw ban khanglad ïa ki kam khaiï beaiñ ha Garo Hills bad ban kyntiew ïa ka ïoh ka kot ki paidbah da ka jingïatreilang.
Ïa kane ka jingthoh ki la ai ruh sha u Deputy Inspector ki BSF, ha kaba ïa kane ka shithi la soi da u Kebil A. Sangma President Krima Council, u Brejio M. Marak Co-Chairman South West Zone Shri. Hamrash N. Marak Chief Organizing Secretary Krima Council bad kiwei kiwei.
