Thmu ka Meghalaya da ka ‘Transformation Journey 2032’ ban pynurlong ïa ka Viksit Meghalaya : Conrad

Shillong, Jylliew 13: Ka NITI Aayog ka la pynlong ïa ka jingïalang ïamir jingmut bad ki Myntri Rangbah jong ki jylla ka thaiñ shatei lammihngi. Ki nongmihkhmat na baroh phra tylli ki Jylla – Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura ki la ïashim bynta bad ïamir jingmut halor ki mat ba kongsan ba ïadei bad ka roi ka par, ki jingsaiñdur thymmai bad ki jingeh. Ka jingïakren na u Ashok Lahiri, Vice Chairperson ka NITI Aayog; Ki dkhot na ka NITI Aayog bad CEO, NITI Aayog ki la sakhi ïa ka jingïashim bynta jong ki Chief Secretary bad ki heh ophisar na ki Jylla ka thaiñ Shatei Lammihngi. Ki jingïamir jingmut ki la sakhi ïa ki jingïakren kiba seisoh bad kiba wanrah ïa ki jingmyntoi.
U Pema Khandu, Myntri Rangbah ka jylla Arunachal Pradesh u la ban jur ba ka thaiñ Shatei Lammihngi ka don hapdeng ka jingkylla kaba khraw bad ka paw kum ka kor ba kongsan jong ka jingroi. Haba ban jur ïa ka lad kaba khraw ba ka Jylla ka don, khamtam ha ka hydropower, u la ban jur ïa ka jingdonkam ban pynkhlaiñ shuh shuh ïa ki sap bad bor treikam jong ki briew jong ka. U la ïasam ruh ïa ki sienjam ba thymmai ha ka kam ai jingsynshar ba dang pyntreikam ha ka Jylla kum ka Sarkar Aapke Dwar, Seva Aapke Dwar bad ka Cabinet Aapke Dwar, kaba thmu ban pynthikna ïa ka jingpynpoi ïa ki lad jingshakri kiba paka bad ban pynbeit kloi ïa ki jingeh jong ki paidbah.
U Himanta Biswa Sarma, Myntri Rangbah ka Assam, u la ai jingmut ba ka roi ka par kadei ban long kaba ryntih khnang ban lait na ka jingïapher ha ki thaiñ bad ban pynthikna ïa ka jingkiew shaphrang kaba kynthup lang ïa baroh. U la ai khublei ïa ka MoU ba kongsan ba la ïasoi hynnin ka sngi hapdeng ka Sorkar India, Assam bad Nagaland na ka bynta ban pynsuk ïa ki kam pynmih umphniang ha ki jaka khappud ka Assam-Nagaland, da kaba ban jur ïa ka kum ka nuksa jong ka jingïatreilang ha ka roi ka par. U Sarma u la ong ruh ba ka Assam ka la paw kum ka Jylla kaba kiew stet tam ha ka ri katba ka dang kiew bha ha ki dak jong ka roi ka par ha ka imlang sahlang. U la ban jur ia ka jingdonkam ban weng ia ki jingdonkam ha ka thaiñ ban pynneh bad pynsted ïa kane ka jingkiew shaphrang.
Ha kane ka jingïakren, u Conrad K. Sangma, Myntri Rangbah ka Jylla Meghalaya, u la ban jur ba ka jingkiew ka ïoh ka kot dei ban kylla sha ka jingkiew shaphrang jong ki briew kaba don jingmut. U la ïasam ïa ka jingthmu jong ka Meghalaya ha ka dur jong ka ‘Transformation Journey 2032’ kaba thmu ban pynurlong ïa ka thong jong ka Viksit Meghalaya.
U Sangma u la kren ruh shaphang ka bynta kaba kongsan jong ki Projek ba la ïarap nabar ban pynbiang ïa ki jingdon jingem kiba kongsan bad ban pynsted ïa ka roi ka par. U la kyrshan ruh ïa ka jingïatreilang kaba kham ïar hapdeng ki Jylla jong ka thaiñ shateilammihngi ha ki bynta jong ka khaïi pateng, ka jingshalan mar shabar ri bad ka jingpynneh pynsah ïa ka mariang, katba u la ban jur ïa ka jingdonkam ïa ki polisi kiba ïadei bad ki jingdonkam ba kyrpang jong ka thaiñ.
U Lalduhoma, Myntri Rangbah ka Mizoram, ha ka jingai jingkren jong u u la ban jur ïa ka lad kaba khraw ba ka jylla ka don ha ka kam jngohkai pyrthei bad u la ïasam ïa ka kam jngohkai pyrthei kaba pynshong nongrim ha ka imlang sahlang kaba la pynïaid da ki self help group bad ki nongshong shnong jong ka thaiñ. U la ong ba ka jingwan jong ki nong jngohkai pyrthei sha Mizoram ka la kiew bun shah ha kine ki saw snem ba la dep. U la pan jingkyrshan ruh na ka bynta ka Mizoram Ginger Mission bad u la ban jur ïa ka jingdonkam ban don ka jingsuk ban pynkylla ïa ki skhim ha Sikkim kiba la kyrshan da ka sorkar pdeng ban weng ïa ki jingeh ha ka jingïoh jingmyntoi kiba ju ïakynduh da ki jylla ka thaiñ shatei lammihngi.
U Neiphiu Rio, Myntri Rangbah ka Nagaland, u la ban jur ïa ka jingdonkam ban bteng ïa ka jingkyrshan ba la ai lyngba ka 15th Finance Commission ban pynneh ïa ka roi ka par jong ka Jylla. U la kren shaphang ka lad ba don na ka bynta ki projek ba thymmai ba ïadei bad ki jingdon jingem, ka jingpynïar ïa ki kam ba ïadei bad ka ïoh ka kot, ka jingwad ïa ka umphniang bad gas bad ka jingpynkhlaiñ ïa ka kam rep. U Rio u la ban jur ruh ïa ka jingdonkam ban kyntiew ïa ki lad leit jingleit bad ban kyntiew ïa ka jinglah ban ïoh ïa ki mar ha kylleng ka pyrthei na ka bynta ki mar kum u coffee na Nagaland. Haba pynskhem biang ïa ka jingangnud jong u ban ïatreilang ha ka roi ka par, u la pynpaw ka jingkyrshan ïa ka jingthmu jong baroh ban pynurlong ïa ka Viksit Bharat.
U Y. Khemchand Singh, Myntri Rangbah ka Manipur, u la kren shaphang ki sienjam kiba dang ïaid shakhmat kiba ïadei bad ki lad ai jingïarap bad jaka sah ha ka Jylla. U la ban jur ïa ka jingdonkam jong ki lad jingpeit bniah kiba khlaiñ ban pynthikna ïa ka jingpyntreikam ha ka por kaba biang ïa ki sienjam ban tei pat bad ban shna ïing, da kaba ban jur ïa ka jingdonkam ban ïatreilang ban kyrshan ïa ki briew kiba shah ktah bad ban wanrah biang ïa ka shongsuk shongsaiñ.
U Prem Singh Tamang, Myntri Rangbah ka Sikkim, u la ïakren halor ka bynta ba kongsan jong ka kam jngohkai pyrthei, ka jingpynïasoh bad ki jingdon jingem ba ïadei bad ki kam digital ha kaba kyntiew ïa ka roi ka par jong ka Jylla. U la ban jur ïa ka jingdonkam ban don ka jingpynïasoh liengsuiñ kaba pynmih pisa bad ban kyntiew ïa ki jingdon jingem ba ïadei bad ki kam digital ban kyntiew ïa ka jinglah ban ïoh bad ki lad kamai ha kylleng ka thaiñ. U Tamang u la kyntu ruh ban bteng ïa ka North East Industrial Development Scheme (NEIDS) ban kyntiew ïa ki karkhana, ban khring ïa ki nongbei tyngka bad ban pynmih ki lad ïoh kam. U la ban jur ïa ka jingdonkam jong ki polisi kiba pyni ïa ka jinglong ba kyrpang jong ka jingbun briew bad ki jingshisha ba ïadei bad ka mariang ha ka thaiñ shatei lammihngi katba ki pynthikna ïa ka roi ka par kaba ïaineh.
U Dr. Manik Saha, Myntri Rangbah ka Tripura, u la kren shaphang ki jingeh ha ka jaka jong ka Jylla, ki pud ki sam kiba heh bad ki jingduna ha ka jingtbit, da kaba ban jur ïa ka jingdonkam jong ki jingïarap ba la thmu ban pynsted ïa ka jingkiew ka ïoh ka kot bad ka jingbei tyngka. U la ïohi ba donkam ban kyntiew ïa ki jingdon jingem ha ka khaïi pateng bad ka jingpynïasoh, kynthup ïa ki check post ba la pynïasoh lang, ki jingshakri kiba ïadei bad ki rel bad ki liengsuiñ. U Dr. Saha u la ban jur ruh ïa ka lad kaba khraw ha ki kam ba ïadei bad ki siej, ki jri, ki jaiñ, ki dawai, ki kam ïalehkai bad ka kam jngohkai pyrthei bad u la kyntu ïa ka jingkyrshan kaba kham khraw na ka bynta ka jingkyntiew ïa ki sap, ka jingsaiñdur thymmai, ka jingpynbha bad ka jingkyntiew ïa ka jingshalan mar shabar ri. U la ban jur shuh shuh ïa ka jingdonkam ban kyntiew ïa ki lad ai jingsumar bad ki jingdon jingem ba ïadei bad ka pule puthi, katba u la kdew ba ka Tripura ka dei kawei na ki Jylla ba nyngkong ban pynkhreh ïa ka kot jingthmu jong ka Viksit Tripura.
Ki jingïakren ki long halor ka jingïathuh ïa ki sienjam kiba jop, ki jingpynwandur ïa ki polisi bad ki skhim pynroi kiba ktah ha kylleng ki kam kum ka rep ka riang, ka jingkyntiew ïa ki jaka nongkyndong, ka koit ka khiah, ka pule puthi, ka jingkyntiew ïa ki sap, ka kam jngohkai pyrthei, ki lad kamai jakpoh, ki jingtei bad kiwei kiwei.
Ha ka jingkren pynkut jong ka, ka Joram Aniya, Dkhot ka NITI Aayog ka la ai khublei ïa baroh kiba la ïashim bynta bad kiba la ïasam ïa ka jingkiew, ki jingjop bad ki jingthmu pynroi jong ki jylla jong ki. Ka la kdew ïa ki mat bad ki jingai jingmut ba la pynpaw ha ka jingïakren bad ka la ong ba ka NITI Aayog kan ïai bteng ban ïatreilang bad ki tnad sorkar pdeng bad ki tnad ba dei peit jong ka Sorkar India ban pynsuk ïa ka roi ka par jong ki jylla ka thaiñ shatei lammihngi.