Nongpoh, Jymmang, 13: U slap ba jur ha ka por shiteng sngi u ba la ther mynta ka sngi ha ka por kumba 12 baje eiei ha thaiñ Jorabat ka la wanrah ka jingshlei um ha shilynter jong u surokbah National Highway, ha ki bynta ba hap hapoh ka jylla Meghalaya bad Assam.
Kane ka jingshlei um ka la jia namar ba ki nala ki la sahkut lut da ki jaboh jabaiñ bad ka um kam ïohlad shuh ban tuid kaba la wanrah shibun ki jingeh ïa ki paidbah, kynthup ïa ki nongdie dukan bad ki kali ba wan ba leit, namar bun na ki kali kim nud shuh ban ïaid bad wanrah ruh ka jingdheng kali ba shipor haduh ba ka um kan hiar.
Lah ban ong ruh ba ka jingshlei um ha Jorabat kam dei shuh ka jingjia ka ba thymmai, namar manla ka por slap ka juh wanrah ïa ka jingeh ïa ki paidbah na ka jingshlei um, watla ka tnat PWD jong ka Assam ka ju leh ïa ka jingpynkhuid ïa ki nala manla ka por shuwa ka aiom slap, hynrei ka jingbun ki jaboh jabaiñ kiba tuid lang ka pynlong ïa kane ka jingeh ban jia na ka por sha ka por.
