Shen yn khot jingïalang na ka bynta ban pynbeit ka jingsam skhim MDC, ïathuh u Bah Sohkhlet

Shillong, Jymmang 13: U Symbud Myntri Rangbah uba khmih ïa ka tnat district council affairs (DCA) u Bah Prestone Tynsong u la pynthikna ba shen un sa khot ka jingïalang jong ka tnat Urban affairs bad Community bad Rural development na ka bynta ban pynbeit ïa ki jingsam ïa ki MDC scheme kiba la mang hapoh ka 15th Finance Commission.
Haba ïathuh ïa kane hadien ka jingïakynduh ïa u Symbud Myntri Rangbah ka jylla u EM ka KHADC u Bah Powell Sohkhlet u la ong, “U Bah Tynsong u la pynthikna ba shen un sa khot ka jingïalang jong ka tnat Urban affairs bad ka C&RD ban pynbeit ïa kane ka kam.”
U la ong ba kane ka kam ka dei halor ki shnong kiba hab hapoh ka Shillong Municipal kim lah ban ïoh ïa ki jingmyntoi na kane ka scheme naba kadei na ka bynta ki shnong ha ki thaiñ nongkyndong kiba long katkum ki kyndon jong ka 15th Finance Commission.
Kum kine ki shnong ki donlang ruh ha Shillong bad Jowai.
“Haba ngi la ïoh ka pisa na ka 15th Finance Commission, ki MDC na ki jaka sor ki buh ki jingkylli ba kumno tang ki MDC na ki thaiñ nongkyndong ki lah ban ïoh bad ban pyntreikam ïa kine ki skhim. Namar kata ngi don ban ai ka jingmut ba naba ïa kine ki skhim la pyntreikam lyngba ki ADC, baroh ki MDC ki dei ban ïoh bad ban pyntreikam ïa kine ki skhim ha la ki jong ki constituency,” bynrap u Bah Sohkhlet.
Haba kylli u EM u la ïathuh ba mynshwa ïa ka skhim la lah ban pyntreikam lang ha ki thaiñ nongkyndong bad ki jaka sor. Hynrei mynta ïa kane ym lah ban leh naba baroh, ha shwa ban pyntreikam ïa kine ki skhim, dei ban upload hapoh ka portal jong ka Panchayati Raj.