Dap 25 snem ka North Liberty HSS, Jowai, pynkup burom ïa ki khynnah skul ba pas bha

Jowai, Jymmang 13: Ka North Liberty Higher Secondary School, Mookyrdup Jowai ha ka sngi Baar ka la sdang ïa ka jingrakhe ‘Silver Jubilee’ ha ka jingshakri ban ai ïa ka jingnang jingstad bad ha kane kajuh ka sngi la pynkup burom ruh ïa ki khynnah pule jong ka skul kiba la pas bha ha ki eksamin ba la pynlong da ka MBoSE mynta u snem 2025.
Ha kane ka sngi la donlang u Symbud Myntri Rangbah Bah Sniawbhalang Dhar uba la long kum u kongsan, u MLA ka Jowai Bah Wailadmiki Shylla kum u Symbud Kongsan, u Principal jong ka skul Bah Richard B. Uriah, ka Joint Director jong ka School Education & Literacy ka sorkar jylla Kong A P. Syiem, ki kmie ki kpa jong ki khynnah skul bad ki nongshah khot sngewbha.
U Principal jong ka skul ula pynpaw ka jingsngewkmen kaba khraw eh namar ka skul mynta ka la kynjop sha u mawmer ba 25 snem, ula ai ka jingïaroh ïa u Symbud Myntri rangbah uba la kyrshan ïa ka skul ha kiba bun ki liang bad ha ka juh ka por ula pdiang sngewbha ïa baroh kiba wan sha kane ka jingïalang.
Ula ong ïa kane ka skul la seng ha ka 1 tarik Lber, 2000 bad ki don haduh 28 ngut ki khynnah skul ha ka Klas Nursary, K.G bad Klas-1. Hynrei kaba pynkmen ïa u kum u Principal ka long haduh mynta ki la don 16 ngut ki khynnah jong ka skul kiba ïoh ïa ki kyrdan kiba shakhmat ha ka eksamin ba la pynlong da ka MBOSE.
‘Ka skul ka la wan bha shakhmat ha ka kam ïalehkai Sports bad ka la jop shibun ki jingïakhun naduh ka Athletic, ka Phutbol nalor kiwei de’, Ula ong kine baroh dei lyngba ka jingïalam bastad jong u Blei Trai kynrad uba najrong.
U Bah Sniawbhalang Dhar haba ai jingkren ula ai ka jingïaroh ïa ki nongpynïaid jong ka skul khamtam eh ïa u Principal u ma Richard B. Uriah ula la trei shitom kumno ban ïalam ïa ka skul katkum ka jingïaid jong ka por. Ha ka juh ka por u pynpaw ka jingsngewkmen ban don kum kine ki skul napoh ka Ri-Lum Jaiñtia kiba la paw bha shakhmat ha ka liang ka pule ka puthi.
U la kyntu ïa ki kmie ki kpa ba kim dei ban pynleit jingmut tang ban ïoh phah skul ïa ki khun shabar na ka District namar hapoh ka District ruh ka jinghikai ka long ka juh hi kumba long sha kiwei de ki jaka.
U la ong ïa ki khynnah skul ba kin long kiba trei shitom ha ka pule puthi, khnang ban suk ka lawei jong ki, u kitbok ïa ki khynnah skul ba kin poi sha ka thong ka jingjop ban long kita ki riew proh jabieñ kiba bat ïa ki kyrdan ba halor bad ban long ruh ki nongïalam kiba ïohi jngai ban wanrah burom ïa ka ïing ka sem, ka District bad ïa ka jylla hi baroh kawei.
U la pyntip na ka liang ka sorkar ruh ka la pynkreh ban plie noh ïa ka MPSC Center hapoh ka sor Jowai, khnang ban suk ki paidbah ka rilum Jaiñtia.