Ther u Dr. Mukul ba khlem pyntreikam ka Sorkar MDA ïa ka MCPPSSA Act

Shillong, Jymmang 18 : U Nongïalam ka Liang Pyrshah u Dr Mukul Sangma u la ther tyngeh ïa ka sorkar MDA ba la ïalam da ka NPP ba ka khlem pyntreikam ïa ka Meghalaya Community Participation nad Public Services Social Audit (MCPPSSA) Act 2017.
Kane ka jingkren pyrshah jongu ïa ka sorkar MDA ka dei hadien ba la paw pyrthei ki jingpyntrei torti ïa ka Inter-State Bus Terminus (ISBT) ba 48 klur tyngka ha Mawiong. Kane ka jingtrei torti bad jingpei um kane ka ïing ophis ka la wanrah ka jinglehraiñ ïa ka jylla namar ka dang shu sdang treikam mynta hadien ba la plie ïa ka da u myntri kam pohïing ka ri u Amit Shah ha u snem ba la dep.
U la ïathuh ban da pyntreikam ïa kane ka aiñ MCPPSSA Act kan plie lad ïa ki riew shimet, ki seng bhalang bad ki shnong ki thaw ba kin long kum ki nongpeitngor ban ym ïoh ban pyntrei torti ïa kane ka jaka ne ïa kino kino ki projek ha ki shnong ki thaw.
U la ong ka la don ka jingïakren naduh mynshwa bad ki seng bapher bapher ki bor shnong bad ki riew paidbah ïa ka jingdonkam ba pyntreikam hok ïa kane ka aiñ. Namar lada kane ka aiñ ka treikam ban shim jingkheiñ ïa ki rukom pyntreikam ym dei tang ki ki nongtrei sorkar hynrei da ki seng bapher bapher, ki riew paidbah bad ki bor shnong bor thaw ruh.Da kane kan khang lad ruh ïa ka jingbamsap.
Hynrei na ka liang ka sorkar MDA pat ka la pyrshang ban leh klet bad kiar na kaba pyntreikam ïa kane ka aiñ. Tangba kane ka jingbuhrieh jong ki ïa kane ka aiñ ba kan ym treikam ka pynpaw shai kdar ba kine ki briew kiba synshar ki don ei ei sha lyndet, ong u Dr Mukul.
U la ong ïa kane ka aiñ la ïoh jingïaroh ruh na ka sorkar pdeng bad wat ka Niti Aayog bad kiwei kiwei ki tnad sorkar pdeng ruh ki phai khmat sha kane ka aiñ namar ka lah ban long kum ka nuksa wat ha kiwei kiwei ki jylla ruh.
Ula ther ruh ba wat ïa ka Lokayukta ruh kane ka sorkar ka pyrshang ban pyntlot bor beit namar ka dei kaba ïeng pyrshah ïa ki kam bamsap. Ka sorkar ka la khniot ïa kane ka ïing bishar bad shah ba ki kam bamsap kin dang ïai kynrei khlem kino kino ki jingpynshitom ïa kiba donkti. Kine ki dei ki dak ki shin kiba shyrkhei tam ïa ka jylla. U la kyntu ïa ki paidbah ba kin kyndit bynriew bad jyrthiaw tyngeh ïa kane ka sorkar. “ Nga sngewsarong bad ju ong ba ïa ka jylla la kyrkhu shisha da U Blei namar ki briew ki long kiba sheptieng ïa ki aiñ Blei bad kiba kloi ban peitngor bad pynsngewthuh ruh sha kiwei bad ngi dei ban ïai bteng ban long kumta kum ka imlang ka sahlang jongka jylla ban ai jingsneng ïa kane ka sorkar khnang ba kine ki kam bamsap bam pong kin lait noh na kane ka jylla” ong u Dr Mukul.