Shillong, Jymmang 18: Ka Federation of Khasi Jaiñtia & Garo People (FKJGP)-Mawlai Circle kala dawa ïa ka Sor kar Jylla ba ka dei ban thung ïa ka jingtohkit halor ka jingshna torti ïa ka Inter State Bus Terminal (ISBT) ha Mawlai Mawiong bad ka jingkieng jong ka surok Mawlai By-Pass.
Ka FKJGP-Mawlai Circle kala dawa ruh ïa ka Sorkar ba ka dei ban tah dak iong (Blacklist) noh ïa ki Contractor kiba pyntrei ïa kine ki project kiba dei ban ai ka jingshakri ïa u paidbah, kiba la long pynban ki jingma ïa u paidbah.
“Ngi dawa ba ka Sorkar ka dei ban tohkit ïa ka jingtrei torti ki contractor ïa ka ISBT bad jingkieng Mawlai By-Pass. Ka dei ruh ban tah dak iong ïa ki contractor ba kin nym ïoh pyntrei shuh ïa ki project ba kongsan ka Jylla” ong u bah Khrawkupar Nongsiej, President ka FKJGP Mawlai Circle.
Kat kum ka jingong jong u, ka seng na Mawlai kala leit peit da la ki jong ki khmat ïa ka jingtei jong ka ISBT ba la bei tyngka da ka Sorkar Pdeng bad ngi shem ba ki kynroh jong ki kamra kila orpoit khamtam lei ka jingjaw um ha kiba bun ki kamra.
“Kane ka pyni shai kdar ba ka don ka jyrsieh ba shyrkhei sha lyndet” ong une u Nongïalam ka FKJGP haba bynrap “Ka long ka jingkyrkhu ïa ki paidbah ka Jylla khamtam ïa ki nongshongshnong jong ka Mawlai haba wan kum kine ki project hynrei kan long pat ka jingtom lada ka Tnad ne ka Sorkar ka ai trei ïa ki kam ha ki contractor ki bym lah ban trei sani ïa ka kam”.
“Mano ban shim ïa ka jingkitkhlieh lada don ka jingmynsaw lada khyllem ki kynroh jong ki kamra ha ISBT bad twa ka jingkieng” ula bynrap.
U Bah Khrawkupar ula ong ba ka Sorkar lyngba ka Tnad PWD ka dei ban shimkhia ha kaban phah trei lane shna janai noh ïa kine ki project.
