Shillong, Jymmang, 18: U Myntri Khynnah ka Sorkar Pdeng uba peit ïa ka Ministry of Law and Justice, u Prof S.P. Singh Baghel u la ong haba ïanujor ïa ka Jylla Meghalaya katto katne kiwei pat ki jylla ha ka ri India ka jingkynrei ki kam be-aiñ ha Meghalaya ka dang duna.
“Ki don ki jingjia kiba ïadei bad ki jingdih pynbuaid bad ka Protection of Children from Sexual Offences (POCSO) ha ka Jylla Meghalaya bad ong ruh ba ki bor jong ka aiñ ki dei ban pynthikna ba dei ban tehlakam ïa ki kam be-aiñ ka long kaba donkam bha,” ong u Prof. Baghel ha ka jingïakren bad ki lad pathai khubor hadien ba la wai ka jingïalang bad ki dkhot jong ka Ingbishar Meghalaya High Court bad ki ophisar jong ka Meghalaya State Legal Authority (MSLA) kaba la long ka nongbah Shillong ha ka sngi Balang.
Ha kane ka jingwan jngoh kaba ar sngi, u Baghel u la peit bniah ïa ka jingpyntreikam ïa ki skhim ka Sorkar Pdeng na ka bynta ki jingdon jingem jong ka Subordinate Judiciary.
U Myntri u la lum jingtip ruh shaphang ki kam kiba ïadei bad ka aiñ ha Meghalaya bad kumno ka Iingshari ka treikam ha ka jylla.
U la ïathuh ruh ba u la leit jngoh ïa ka Juvenile Centre, kawei ka Hospital bad kawei ka Dispensary.
U la pynpaw ka jingsngewkhia jong u halor ki jingjia shah thombor jong kiba dang khynnah, na ki 17 ngut ki khynnah shynrang ba don ha Juvenile Centre, 15 tylli ki dei ki Case jong ka POCSO. U la ong ba ki kam be-aiñ da ki khynnah ka dei ka kam kaba don jingma namarba ka ktah ïa ka imlang sahlang ha ka ri.
“Ka jingkiew ki kam be-aiñ da ki khynnah ka dei kaba la ktah ïa ka pyrthei baroh kawei bad ki khynnah mynta ki donkti ha ki kam ba kham shyrkhei. Ka dei ka jingeh kaba sngewkhia na ka bynta ka ri kaba donkam ban peit bha ïa kane,” u la bynrap.
U banjur halor ka bynta jong ka imlang sahlang, ki kmie ki kpa bad ki paralok jong ki. “Ka jingïashim bynta ka imlang sahlang ha ka jingai jinghikai ha ki kam kiba ïadei bad ki kam beain jong ki khynnah kalong kaba donkam,” u la ong.
“Ki don bun ki bynta kum ka imlang sahlang, ka ïoh ka kot bad kiwei kiwei ba pynlong ïa u khynnah ban leh ïa ki kam be-aiñ. Ka dei ka kamram jong ngi ban sngewthuh kiei ki jinglong jingman ba pynlong ïa u khynnah ban leh ïa ka kam beaiñ,” u la ong.
U Prof. Baghel u la ong ba ki nongïalang Balang ki don ïa ka bynta kaba khraw ban wanrah jingkylla ha ki khynnah rit kiba shem jingeh.
“Lyngba ka jingïalam lynti kaba dei bad ka jingkyrshan, ngi lah ban wanrah ïa ka jingkylla ha ki khynnah. Ki Centre ki dei ban kynthup shuh shuh ïa ki kam ïalehkai, ka Yoga, ka jingpynleit jingmut bad ki jingïalang ba kynja mynsiem na ka bynta ki khynnah khnang ba kin lah ban lait na ka por jong ki jingkulmar jingmut ba ki ïakynduh namar ki jinglong jingman jong ka rukom im ba ki ju don mynshuwa,” la ong une u Myntri.
U la ong ba ki bahaiing hasem ki dei ban peitngor ïa ki kam jong ki khun jong ki khnang ban pynthikna ba kin ym ngop ha ki riewsniew. “La kheiñ ïa ka Jylla kum ka nongïada jong ka imlang sahlang bad ka dei ka kamram ban ïarap ïa ki khynnah ban lait na ka jingeh,” u la ban jur.
U la pynpaw ka jingsngewhun halor ka jinglong ka kam ha Meghalaya bad ka Percentage jong ka jingpyndonkam ïa ki pisa.
Ha kaba ïadei bad ka jingkyrpad shuh shuh na ka bynta ka jingïarap pisa ban kyntiew ïa ki jingdon jingem da ka Jylla, u Myntri u la ong ba ka Ministry jong u ka la mang pisa T. 16 klur dang shen bad un sa pyrkhat ïa kane, hadien ba la peit bniah ïa ka jinglong ka jingpyndonkam ïa ki pisa, ha kaba ïadei bad ka jingai pisa shuh shuh sha ka jylla.
“Nga sngewkmen ba ka Sorkar Pdeng ka la mang palat T. 700 klur na ka bynta ban kyntiew ïa ki jingdon jingem, khamtam na ka bynta ka kam jong san tylli ki iingbishar POCSO,” ïathuh u Prof. Baghel.
U Myntri u la pyntip ba ka dei katkum ka jingbthah jong u Myntri Rangbah duh ka ri u Narendra Modi ba u la wan jngoh ïa ka jylla Meghalaya bad ïa ka Jylla Assam.
Ka thong jong ka jingwan jong u Modi ka long ban lum jingtip halor ka jingpyntreikam ïa ki skhim ka Sorkar Pdeng ha kine ki Jylla, ban leit jngoh ïa ki jaka bad ban peitngor ïa ka jingpyntreikam ïa ki skhim bad ban peit bniah ïa ki kam jong ka tnat, kiba ïadei bad ka tnat kaba u khmih bad kumjuh ïa kiwei ruh ki tnat.
