Leit jngoh u Ambassador ka South Korea ïa ka Dr. APJ Abdul Kalam Memorial Herbal Garden

Shillong, Jymmang, 18: U Ambassador jong ka ri South Korea u Chang Jae–bok bad ka kurim jong u ka Gu Jung–Hyun ha ka sngi Balang ki la leit jngoh ïa ka Dr. APJ Abdul Kalam Memorial Herbal Garden kaba don ha ka thaiñ Pynursla.
Kane ka kper rep kynbat ka don ha Wah Daeng Rod kaba hap ha ka jaka jong ka Khun trai Saw Kur khap Umsong ha ka shnong Pynter.
Ki nongpynïaid jong kane ka kper hapoh ka jingïalam jong ka Khun Kur Longtrai Lai Kynthei , Raid Shabong ryngkat bad ka shnat jong ka Khun Trai Saw Kur Khap Umsong hapoh ka jingïalam jong u General Secretary u Bah Riban Lyngdoh bad u Pa’iem Laborious Manik S. Syiem ki la hiar ban plie ïa u mawnongrim ha ka jaka ba la thung kynbat kaba la ai nam ha ka kyrteng jong u President barim ka Ri u Dr.APJ Abdul Kalam .
Ha kane ka jingleit jngoh ïa kane ka kper thung kynbat dawai u Chang Jae–bok bad ka kurim jong u ka Gu Jung–Hyun ki la thung ïa ki kynbat dawai ha kane ka sngi.
Hadien kane la pynlong ruh ïa ka jingïalang ba lyngkot ha ka iingdorbar Neng Gate, Pynursla ha kaba u Ambassador u la long u Kongsan bad ïa ka jingïalang la pynïaid da u Pa’iem Laborious Manik S. Syiem uba long ruh u Adviser bad Convener jong katei ka kam.
La sakhi lang ha kane ka sngi da u Sub-Divisional Officer (SDO), u Block Development Officer (BDO ), u Sordar Hima Mawdon u Bah H. Skhemlon , u Pa’iem Khynnah ka Hima Khyrim, ki Rangbah Shnong , ki nongsumar Kynbat, ki Sordar bad kiwei kiwei.