Byrthen ki 42 shnong ka thaiñ Kyrshai ba thmu pyntrei biang ïa ka Kulsi Hydro Project

Nongstoiñ, Jymmang 18: Ka jingthmu jong ka Brahmaputra Board ban den ïa ka wah Khri, na ka bynta kaba don kham sharum ïa ka shnong Ukiam bad Kyrshai kiba hap ha West Khasi Hills, ka la pynkhiwin biang sa shisien ïa ki sawphew ar tylli ki shnong kiba don ha katei ka thaiñ.
Kan wanrah ïa ka jingduh kaba shyrkhei bha ym tang ïa ki jaka jong ka Meghalaya, hynrei kan ktah ruh ïa palat 19 tylli ki shnong jong ka Assam kiba shong da ki Rabha, ki Boro bad ki Garo. Nalor kata ki jaka rep kiba da ki phew hajar hektar bad ki shnong ki thaw kiba hap ha West Khasi Hills kin shah ktah.
Kumta ha ka sngi hat majai jong kane ka taiew, ki nongsynshar jong ki sawphew ar tylli ki shnong ryngkat ka jingïatreilang bad ka seng longkmie jong ki Garo kaba la tip kum ka Mothers Union, ki la pynlong ïa ka jingïalang ha ka shnong Ukiam ha kaba ki la khot lang ruh ïa u bah K.P.Pangñiang MLA barim ka Rambrai Jyrngam, ban ïadon ryngkat na ka bynta ban ïatai bad ïa phylliew jingmut kumno kin leh, lada ka Brahmaputra Board kan pyntrei biang ïa katei ka Kulsi Hydro Project.
Ha katei ka sngi la ïoh nyngkong ïa ka jingpynshai na u Bipul Rabha. Nangta na ka kong M.Marak kawei na ki nongïalam ba hakhmat jong ka Mothers Union Ukiam Area. Katei ka longkmie haba ai jingkren ha katei ka sngi, ka la pynpaw ïa ka jingsngewkhia ha kaba ka la ong ba lada den ïa ka wah Khri, ki jaka rep jaka riang, ki shnong ki thaw kin ngap jyllop lut hapoh um bad baroh ki paitbah shnong kiba shah ktah, kin kylla phetwir bad ka lawei jong ki khun ki kti kan long kaba jynjar sat. Nalor kata ka la ong ba kin ym satia wat tang ïa ka jaka ban shong ban sah ruh.
La ïoh ruh ïa ka jingkren na ki nongsynshar jong ki shnong kiba hap ha ka Kamrup District, ha kaba ki la ong ba ki paitbah Khasi, Garo, Rabha Boro bad kiwei kiwei ki jaitbynriew kiba shong ka katei ka thaiñ, lada ki ïoh jingtip ba ka sorkar Assam ka don ka jingthmu ban tei jubor ïa katei ka projek bording, kin ïa pyntip mar kylliang bad ki ïeng tylli kawei ban pyrshah. Kam pher wat lada kan poi ha uno uno u pud ruh, namar ban duh ïa ki jaka rep jaka riang ba ki la trei la ktah da ki phew snem ka long kumba ki la duh lypa ïa ka jingim.
U bah K.P.Pangñiang u la pynshai ba katkum ka map ba la pynkhreh da ka Brahmaputra Board ha ka Detail Project Report, ba ka la phah sha ka Ministry of Power jong ka sorkar pdeng, ka jingheh jong katei ka dam ka long kumba shiphew square kilomitar bad ka jingjylliew na khyndew sha sla um ka long 62.35 mitar kaba long kumba 186 put tam. U la pynsngew ruh ïa ki kyrteng jong ki 42 tylli ki shnong ki ban shah ktah ha katei ka um.
La pule ruh ïa ka memorandum kaba la thoh bad la ïasoi da baroh ki nongsynshar shnong Khasi, Garo, Rabha bad Boro na ka bynta ban leit aiti ha u Himanta Biswa Sarma Myntri Rangbah ka Assam bad ha u Conrad Kongal Sangma Myntri ka jylla Meghalaya, ba ki dei ban pynsangeh shisyndon ïa katei ka jingthmu ban den ïa ka wah Khri. U bah K.P.Pangñiang ryngkat ki katto katne ngut ki nongsynshar shnong, kin sa leit ban ïakynduh ïa u Himanta Biswa Sarma bad ïa u Conrad Kongal Sangma ha kine ki taïew ban wan, ban aiti ïa katei ka jingthoh bad ban pynsngew ha ki ïa ka jingeh ba ki paitbah jong ki 42 shnong ki ïakynduh lada den ïa ka wah Khri. Lada kim sngap kin sa ïakynduh biang ban ïa pyrkhat kumno kin leh.