Ther u Conrad ïa ka BJP ba kam ba ka skhim FOCUS bad FOCUS + ki dei ki skhim sorkar pdeng

Shillong, Rymphang 06 : U National President ka National People’s Party (NPP) Conrad K Sangma, hynne ka sngi nyngkong, ula ther tyngeh ïa ka Bharatiya Janata Party (BJP) halor ka jingkam ba ka skhim FOCUS bad FOCUS+ ka dei ka skhim ka sorkar Pdeng.
Ula kyntu ïa ka BJP ba kam dei ban pyn sngewthuh bakla ïa ki paidbah na ki rynsan ïalap elekshon da kaba ong ba ka FOCUS bad FOCUS + ka dei ka skhim ka Sorkar Pdeng.
U Conrad ula kren ïa kane ha ka jingïalang ïalap elekshon ha Machangpani kaba hap hapoh ka Dalu Constituency, ban pan jingkyrshan ïa u kyrtong ka Party u Brening A Sangma, u ban ïakhun ha kane ka elekshon MLA-2023 ban long la 27 tarik Rymphang.
Haba kren ha ka jingïalang, ula kyntu ïa ka BJP ym ban ïaid ïalap election da ki jingpyn sngewthuh bakla ïa ki paidbah ha Ri-lum Garo da kaba ong ïa ki paidbah ba ka skhim FOCUS bad FOCUS + ka dei kaba wan na ka Sorkar Pdeng.
Ula pyntip ba ka PM Kisan ka dei ka prokram kaba ïapher bad ka dei ka bym lah ban pyntreikam ha Jylla namar ba bun ki Nongrep kim don ïa la ki jong ki jaka hapoh ka Jylla.
Ula ong ba ka BJP kam don lynti pat da kumwei ne ka ishu ban kynthoh pyrshah ïa ka NPP bad dei namar kane kala ïaid da kane ka buit poh.
U Conrad ula ong ba ka BJP kan ym lah ban thaw pyrthei ha kane ka elekshon ban wan namar ka party kan nym jop wat ia 2 tylli ki constituency. Kiba bun ki BJP kynthup u MDC Dhormonath Sangma mynta kila wan ban pynïasoh sha ka NPP.
Ula ong ruh ba ka lyer jong ka NPP kala beh ha baroh kawei ka Jylla bad ki paidbah kim dei ban pynsepei kai ïa ki vote ha kiwei pat ki Political Party bad ban vote ïa ka NPP.
“Ka Lyer elekshon 2023 kala beh ha baroh kawei ka Jylla, ka sur u paidbah ka long shai bha ba ka NPP kan poi sha ka thong ban jop palat mar shiteng ïa ka jingdon ki MLA ha Jylla.