Thep kyrteng 5 ngut ki kyrtong NPP, 1 HSPDP, 1 Congress bad 1 PDF ban aireng haka elekshon 2023 na Ri-Bhoi

Nongpoh, Rymphang 03: Kumba 8 ngut ki kyrtong na Ri-Bhoi kiba la thmu ban aireng haka elekshon sha ka ïing Dorbar thawaiñ ka jylla naki Constituency bapher bapher mynta ka sngi kila pyndep ïaka jingthep kyrteng jong ki hakhmat ki Returning Officer ha ophis u Deputy Commissioner ka Ri-bhoi District.
Napdeng kitei ki 8 ngut ki kyrtong kiba la pyndep ïaka jingthep kyrteng mynta ka sngi 5 ngut ki dei naka party NPP ba kynthup ïa u Bah Sosthenes Sohtun na Jirang Constituency, ka kong Macdalyne S Mawlong na Nongpoh Constituency, u Bah Jason S Mawlong na Umsning Constituency, u Bah Shemphang Lyngdoh na Mawhati Constituency bad u Bah Damanbait Lamare na Umroi Constituency, katba kiwei ki kyrtong na kiwei ki party kiba la pyndep ïaka jingthep kyrteng ki kynthup ïa u Bah Primson Makdoh na Umsning Constituency naka seng HSPDP, u Bah Adrian L Chyne Mylliem ka seng Congress na Jirang constituency bad u Bah Donlang Sohkhlet ka seng PDF na Umsning constituency.
Haba kren sha ki lad pathai khubor naka liang kitei ki kyrtong ki don la ka jong ka thong ban shakri haki Constituency ba ki thmu ban aireng ha kane ka elekshon khamtam ban wanrah ki jingkylla ha kaba ïadei bad ka roi ka par bad ka bit ka biang jong ki paidbah ba bun ba lang, hynrei dei tang u Damanbait Lamare kyrtong ka NPP na Umroi u bym shym la treh ban kren bad kyntait ban kren sha ki lad pathai khubor bad phet jyndat mar ïa dep thep kyrteng.
U Bah Sosthenes Sohtun kyrtong ka NPP na Jirang u la ong ba kum u MLA ba ki paidbah kila jied u la dep ban shakri haki snem bala leit noh bad wanrah ruh shibun ki kam pynroi naduh ki surok ba kongsan tam haka thaiñ Jirang, ki jaka sumar, ki jaka pule, ka Civil Sub Division kaba dei ka jingangnud ba hakhmat eh jong ki paidbah, hynrei ka Jirang Constituency ka dang donkam shibun ki kam pynroi khamtam ki surok bad kyrmen skhem ba ngan lah biang ban shakri kum u MLA ha kine ki 5 snem ban wan ban pyndep ïaki jingangnud.
U Bah Shemphang Lyngdoh Kyrtong ka NPP na Mawhati u la ong baka jignangnud jong nga ka long ban kyntiew ïaka dong ka thaiñ ka jong ngi, namar hadien baka jylla kala dap 50 tylli ki snem hynrei kaba synei ka long b aka Mawhati ka dei kaba sahdien tam bad don katto katne ruh kiba la ai syrnod ba ka Mawhati ka dei kaba sahdien tam bad hadien ba ngala ïaid bad rung sha kitei ki thaiñ ga lap shisha ba ka long kumta, bad ka jingmih jong nga ban aireng ha kane ka kynti ba mynta ka long ban ai ka jingshakri kaba hok, ba sngewrit bad ba jynsur mynsien naka bynta ki paidbah ka Mawhati bad ka jaitbynriew hi baroh kawei.
Ka kong Macdalyne S Mawlong kyrtong ka NPP na Nongpoh haba kren ha katei ka sngi kala ong ba ka jingthmu jong ka ban ai reng ha kane ka kynti ba mynta na Nongpoh Constiteuncy ka dei namar ba ka iohi shisha ïaka sahdien ki shnong ki thaw, bad ngi lah ban ong baka Nongpoh Constituency ka dei kaba dang thylli bad suda naduh ki lynti ki syngkien, ka umbam ka umdih, ka ïew ka hat jong ki nongrep, ka jingshlei um ba naka por shaka por ba ki paidbah ki mad jingeh bad lada ki paidbah ki ibit ïanga ban long kum ka nongmih khmat ngi lah ban weng ïakine ki jingeh lyngba ka jingïatreilang naduh ki longkmie ki longkpa, ki nongïalam ñiam ban poi shaka thong kumba angnud.
U Bah Jason S Mawlong kyrtong ka NPP na Umsning u la ong haba ngi phai dien ha kine ki snem bala dep ki paidbah kila shañiah hanga bad ngala pyrshang ban trei katba lah, namar haba nujor ïaki snem bala leit noh shuwa ba ngan shimti kum u nongmihkhmat shibun ki jingkylla kila wan naduh ki surok u budlum ka roi ka par, hynrei ka jingwan lyngshop ka khlam Covid- 19 kala buh jingeh ban pyndep ïaki kam pynroi bad kyrmen skhem ba lada ki paidbah ki dang ibit yn dang lah ban pyndep shibun ki jingangnud kumba la thmu.
U Bah Primson Makdoh kyrtong ka HSPDP na Umsning u la ong ba kawei naki thong bad ka jingangnud ba hakhmat eh kaadei halor ka jingeh ki paidbah ka thaiñ khappud b aka jylla haduh mynta kam pat lah ban pynbeit ïa u pud u sam, bad kyrmen skhem ba lad aka ka HSPDP kan wan haka bor ki kam khappud ki dei ba hakhmat eh nalor kiwei kiwei ki kam pynroi naduh ka pule puthi, ka kam rep kam riang, ka iohkam iohjam ki samla bad kiwei kiwei.
U Bah Donlang Sohkhlet kyrtong ka PDF na Umsning u la ong ka sienjam ba u la mih ban aireng biang ha kane ka kynti ba mynta ka dei namar ba u kwah ka jingkylla bad ka roi ka par kan wan haki shnong ki thaw namar kumba long mynta ka roi ka par kam don ha Umsning Constituency bad ka shong haka jingstad ki paidbah ban jied ïaki nongmihkhmat lada ki kwah ka jingkylla bad ka roi ka par kan wan ha Umsning constituency bad haba peit ïaki shnong ki thaw bun ki paidbah ki ud bad ka pynpang mynsiem ïanga dei namar kane ka daw da ka mon ba lait luid nga la mih madan ban airen ha kane ka elekshon.
U Bah Adrian L Chyne Mylliem kyrtong ka Congress na Jirang u la ong ba nga don ka jingkyrmen kaba skhem ban jop ha kane ka elekshon kaba mynta, bad nga don ka thong ba hakhmat eh ban plie lad plie lynti ïaki samla ka jylla kiba la shu shong khlem kam khlem jam, ban kyntiew ïaki nongrep bad khamtam ban pynkhlaiñ ïaki khappud ka Jirang Constituency bad ka jylla baroh kawei kumba ki paidbah ha katei ka thaiñ ki mad jingeh naka por shaka por.