Shillong, Rymphang 03: Ka Khun Hynñiewtrep National Awakening Movement (KHNAM) ha sngi Thohdieng, ka la pynbna paidbah ba kan ym sei kyrtong satia ha kane ka elekshon MLA ban sa long ha ka 27 Rymphang 2023 da kaba ai daw ba ka party kan pynleit jingmut shuwa ha kaban pynkhlaiñ shuwa ïa ka party.
Haba kren sha ki lad pathai khubor u Vice President ka KHNAM u Bah Thomas Passah u la ïathuh ba ka Party mynta ka kynti kan pynkhreh ban nang pynkhlain shuh shuh ïa ka party na ka bynta ban ïakhun ha ka MDC Election ka ban long ha u snem ban wan.
U Bah Thomas u la ïathuh ba ïa ka rai ban ym pynieng kyrtong ha kane ka election MLA 2023 la shim ha ka jingïalang ka Central Executive Committee (CEC) jong ka party kaba la long ha kine ki khyndïat sngi kiba la dep.
“Naduh 2018 ka KHNAM ka don hapeng ka kynrum kynram bad namar ka jingbym biang ka por ban pynkhreh ïa ka elekshon ba mynta, kum ka party ngi la shim ïa ka rai ban nym pynieng kyrtong satia ha kane ka ilekshon 2023”, u la ong.
U la ïathuh ruh ba ha ka jingshisha ki don kumba 9 ngut kiba la pan Ticket na ka KHNAM ban ïakhun ha kane ka elekshon 2023 hynrei hadien ka jingbishar bniah, ka party ka sngew ba kam dei ka nongrim jong ka KHNAM ban shu pynieng kyrtong tang ha ka nam lada ym lah ban jop.
U la ong ba na ka liang ka party ka la shim ïa ka rai ba kan nym ïalap elekshon ïa kano kano ka party ha kane ka elekshon ban wan hynrei kan ïaleh ban pynkhlain ïa ka party ban ïakhun ïa ka MDC election 2024 bad ha kiwei ki elekshon hadien ha bud.
Haba kylli la ka jingbym pynieng kyrtong ha kane ka elekshon kadei namar ka jingphet noh u Bah Adelbert Nongrum u MLA ba marwei ba jop na ka KHNAM ha u 2018, Bah Thomas u la ong ba ha ka synshar paidbah baroh ki don ka hok ban mih ne ïasoh ha kano kano ka party hynrei ka jingphet jong u Bah Adelbert kam dei satia ka daw ba ka party kan ym pynmih kyrtong ha kane ka elekshon.
