Thang dusmon ki briew ïa ka jingkieng ïaid kali ban ïaid na Maheskola sha Sohhylleng

Mawkyrwat, Lber 17 : Kawei ka jingjia ha kine ki khyndiat sngi ba ki briew bym lah ban ithuh ne tip thikna ki la wiang ding ïa kawei ka jingkieng ïaid kali kaba dei ïaid na Maheskola sha Sohhylleng kaba dei ka jingkieng No 7/1 ha ka 7 kilometre.
Katkum ka jingiathuh jong u Sahep D. Kyndiah, Executive Engineer ka PWD (Roads) jong ka Ranikor Division, South West Khasi Hills District u la ong ba kane ka jingjia ka la jia ha ka 15.3.2025 kaba dei ka jingkieng No 7/1 ha lynti na Maheskola sha Sohhylleng.
Ym tang kata, kane ka jingkieng ka dei ruh kaba pynïasnoh ïa ki lai tylli ki shnong ka Sohhylleng, Amarsang bad shnong Umtong-kut kiba hap hapoh jong ka Ranikor Civil Sub Division, South West Khasi Hills District.
Lah ban kdew ruh ba ka Ranikor PWD (Roads) Division ka peit ïa ka jingïar jong ki lynti synkien kaba heh palat 200 kilomitar ki surok bad 25 tylli ki jingkieng Semi Permanent Timber(SPT), Kine ki jingkieng ki dei ki lynti kiba kongsan bha na ka bynta ban kit ïa ki mar bad ki briew ba leit jingleit pynban, da ka jingpynjot jong ki ka wanrah ïa ka jingeh kaba khraw ïa ki nongshong shnong bad ki nongpyndonkam surok.
Kumta, na ka liang ka ophis ka kyntu ïa baroh ki nongshong shnong ba kin ai ka jingïatreilang bad ki bor ba dei peit bad ban pyntip ïa kino kino ki kam kiba suba kiba ïa dei bad ka jingpynjot ïa ki jingtei paidbah. “Ka jingïatreilang jong ki paidbah ka long kaba donkam ban pynthikna ïa ka jingshngaiñ bad jingbha jingmiat jong ka imlang sahlang”, kyntu u EE ka PWD (Roads).
Namarkata, na ka liang ka ophis jong u PWD (Roads), u Sahep D. Kyndiah uba dei u Executive Engineer u la buh ka jingmaham ba tyngeh bad pyrshah jur ïa kiba pynjot bad jingthang ding ïa ki jingkieng jong ka Ranikor PWD (Roads) Division ne wat ban ktah kti ïa ki mar ki mata jong ka sorkar. U la ong shuh shuh kino kino kiba lap ba ki donkti ha kaba pynjot ne pynjulor ïa ki jingtei paidbah kin shah pynngat ha ki kyndon aiñ da kaba yn pynngat ïa ki jingpynshitom kiba jur, kynthup ïa ka jingshah set phatok bad ka kuna kaba heh.
Halor kane ka jingjia, u Sahep D. Kyndiah, Executive Engineer ka PWD (Roads) jong ka Ranikor Division, South West Khasi Hills District u la dep ruh ban buh da ka ehjahar hapoh Nonghyllam Police Station.