Phah ka sorkar ïa ki ophisar sha Karnataka ban tohkit halor ka jingjia ngat bih ki khynnah bad khlad uwei

Shillong, Lber 17: Ka Sorkar Jylla hynne ka sngi ka la phah ïa arngut ki heh ophisar ka Tnad Pule Puthi ba kin leit sha Karnataka bad ïatreilang bad ki bor District halor ka jingïap uwei u khynnah skul 13 snem na Meghalaya na ka jingngat bih uba dei ruh uba dang pule ha ka klas kaba hynriew.
Une u khynnah skul u dei na ka Shnong Lyndem, Pynursla Sub Division.
Nalor une u Khynnah, ki dang don sa 28 ngut kiba la shitom jur hadien ba ki bam ïa ka jingbam ba la wanrah hapoh ka Hostel ba treikam be-aiñ jong ka skul shimet kaba don ha ka Shnong T Kagepra ha Malavalli Taluk jong ka Mandya District.
Napdeng kine ki 28 ngut ki khynnah ba shitom la ïathuh ba 23 ngut ki dei kiba na Jylla Meghalaya.
Haba shimkhia ïa ki khubor ba mih ha ki lad pathai khubor, ka Sorkar lyngba u Director ka School Education & Literacy, ka la phah ïa arngut ki ophisar ba kin leit sha Karnataka ha ka ban ïarap lem ïa ki bor District bad ruh bad ki kmie kpa jong kine ki khynnah na Meghalaya.
Kine ki arngut ki ophisar ki dei u Bah P Sunn, Sub Inspector of School, Sub Divisional School Education Officer, Shillong bad u Bah R Kharsyntiew, District MIS, PM-POSHAN, Shillong.
La pyntip ba kine ki ophisar kin hap ban aiti ïa ka kaiphod halor kane ka jingjia.
La kynnoh ba ka jingïohpang kynsan jong kine ki khynnah skul ka la wan jia hadien ba ki ïabam ïa ka jingbam ba la wanrah da ki bor pynïaid ka Hotel, kaba dei ka bam ba tam na ka jinglehkmen Holi ha ki jaka ba marjan.
La kynnoh ruh ba kane ka Hostel ka ju ai bam ïa ki khynnah da ki bam ba la tam na ki ïingïathoh, ki khawai dawai bad kiwei kiwei.