Kyrthat ki nongtrei bank sorkar ba bun ka kam bad duna ki nongtrei, arsngi yn mih ban pyrshah

Shillong, Lber 17 : Ka kynhun jong ki bank sorkar hapoh ka lama jong ka United Forum of Bank Unions ha ka sngi Nyngkong ki ong ba ki la shem jingeh ha ka rukom treikam namar katba nang ïaid ka snem ka kam ka nang bun katba ki nongrei pat ki nang duna.
Haba kren bad ki lad pathai khubor, ki nongïalam ka Union ba kynthup ïa Wanraplang Mawroh Convenor Meghalaya State Unit bad u Bah Davies Lyngdoh State Secretary ka AIBOC ki la ïathuh ba kane ka United Forum of Bank Unions kadei ka kynhun jong baroh ki bank sorkar ha baroh kawei ka Ri.
Kine ki nongïalam ki la ïathuh ba shi bynta ban pynurlong ïa ki mat jingdawa ba kum ki nongtrei ha ki bank sorkar ki buh, ki la rai ban pynlong da ka jingmih pyrshah kaba 48kynta, kata naduhka shiteng miet jong ka 23tarik Lber haduh ka shiteng miet jong ka 25tarik Lber.
“Ki nongtrei jongngi kiba don ha ki clerical bad sub-staff ngi la duna haduh 38 persen. Nga tharai ba kan dei ka sien kaba nyngkong ba phin ïohsngew ba ha ki 10 snem ha ka jaka ban nang bun ki nongtrei hynrei ngi pat ngi nang duna. Ha ki 10 snem ngi la plie da ki spah bad ki hajar tylli ki shnat treikam bad ngi la dei ban don bunbha ki nongtrei. Hynrei ngi pat naduh u 2013 haduh u 2024 na ki 8.86 lak ngut ki nongtrei ngi la hiar sha ka7.46 lak ngut ha u 2024. Katba ha ki bank shimet na ka 2.29 lak ngut ki nongtrei ha u 2013 ka la kiew mynta sha ka 8.46 lak ngut ha u 2024 kaba long ka jingkiew kaba haduh 250 persen,” ong u Bah Davies.
Kumta, u la ong ba dei halor kane ka nongrim ba ki dawa ba dei ban don ka ka jingthungkam khnang ba ka jingtreikam ha ki bank kan long kaba ryntih bad kaban ym bankhia.
Nangta ki la ïathuh ruh ba lada nujor, ba uwei uwei u nongtrei ha ki bank sorkar u hap banpeit ym duna ïa ka 2000 – 2500 ki paidbah katba lada nujor bad ki bank shimet kin poi tang kumba 200 ngut ei ei kumta ka jingkhia ka kam ka la long kaba jur.
Na ka liang ki nongïalam ka Union ki la dawa ruh ba dei ban pyntreikam ïa kata ka jingtreikam kaba san sngi ha ka shi taiew namar kumba long mynta ki hap ban trei haduh 6sngi ha ka shi taiew nalor ba ka kam ruh ka khia.
Ki la don ruh shibun kiwei pat ki mat kiba kum ki nongtrei ha ki bank sorkar ki kynduh hynrei ki la pynpaw ba kitei ki mat kidei kiba kham kongsan ha ka jingtreikam jong ki kiba man ka sngi.