ïakhih ki samla pule NIT ha Sohra ba pei ki umkor sha kamra bad per ki skaiñ ha ki jingbam

Shillong, Lber 17 : Ki samla pule ka National Institute of Technology (NIT) Meghalaya, kila pynlong ïa ka jingïakhih mynta ka Lah Sngi U Blei namar ka jingbym lah pynbiang ki bor pynïaid ïa ki jingdonkam ba man ka sngi jong ki samla hapoh ka Campus ha Sohra.
Ki samla pule kiba la ïashong kyllaiñ myngngor hakhmat ka Ophis Administrative Block, kila pynpaw ïa ka jingsngewkhia halor ka jingbym khuid ka bam ka dih, ka jingbym khuid ka sawdong sawkun, ki jingbym don ka gym ïa ki samla pule kynthei, ka jingthut ka bording bad Wifi nalor ka jingtrei torti ïa ka jingtei kaba lam shaka jingjreiñ/pei um ha ka por ba jur slap.
Na ki durkhmih (video) bala ring da ki samla pule, la pyni ïa ka um kaba mih kum ka kor um hapoh ka kamra bad mih ruh kum ka shyng-iar na ki socket bording ha ka kamra jong ka Hostel ki shynrang.
Ki samla pule kila dep phah teng ïa ka shithi sha u Director ban pynpaw ïa baroh ki jingsngewkhia hynrei ym shym la leh eiei satia haduh mynta. Kane ka jingmynthi kala pynbor ïa ki samla pule ban shim ïa ka lynti jong ka jingïakhih.
Nalor kane, ki samla pule kila ujor ruh halor ka jingbym ïoh ïa ka umbam umdih kaba khuid bad ka jingbym don ki lad ai jingsumar haba kem pang kynsan kynsan.
Ka jingujor kala kdew ïa ka jingsma iwtung jong ka um, ka jingduna jong ki nongtrei ban pynkhuid ïa ka campus bad ka jing sngew baheh jong ki nongsam bam kiba ju kyntait ban ai tam ïa ka bam haba pan.
Ka dur bala shon da ki samla pule ka pyni ruh ba u dai bala ai bam sha ki samla pule u dei uba dap da ka um kum ka syrwa, kaba ïasyriem ïa ka syrwa shynrai ha ka jaka jong u dai. Ha kawei na ki dur, la ïohi ruh ïa u skaiñ uba dem ha ka jyntah dohkha kylla.
Haba iadei bad ka WiFi connection, ki samla pule kila ïathuh ba man ka Sngi U Blei, ki bor pynïaid kim ju ai satia ïa ka WiFi bad ha kiwei kiwei ki sngi, kaba bun hi ka dei ka jingthut, kaba la ktah bha ïa ka kam wad bniah (research work) bad ka pule dangle.
Lah ban kdew ba ïa ka NIT Meghalaya la pynkynriah na ka campus ba shipor ha Shillong sha Sohra ha ka 16 tarik Kyllalyngkot mynta u snem.
Haba bitar ïa ka jingshimpor ban tuklar, ki samla pule kila dawa ïa ki bor pynïaid ba ki dei ban leh eiei noh mardor, haba ban jur ba kum kine kiei kiei baroh kila pynthut ïa ka pule ka dangle bad pynthohbria ïa ka nam jong kane ka jaka pule.