Thalaiñ u CEM ka JHADC ïa ka VPP ba shim kabu kam trai ïa ka jingpyllait pisa ka Sorkar ban siew tulop ïa ki nongtrei
Shillong, Nailur 30 : U Chief Executive Member (CEM) ka JHADC Bah Thombor Shiwat ha ka sngi Nyngkong, ula thalaiñ tyngeh ïa ka Voice of the People Party (VPP) halor ka jingpyrshang ban shim kabu ban kam trai ïa ka sienjam ba la shim da ka Executive Committee ka NPP ban pynïoh pisa na ka bynta ban pyllait ïa ka tulop ba sahteng haduh 7 bnai jong ki Nongtrei ka Council.
Haba ïakren bad ki nongthoh khubor, u Bah Thombor ula ong ba ka VPP kam dei tang ka Seng Saiñ Pyrthei hynrei ka dei ruh kum ka kynja Sengbhalang.
Ula kynthoh ïa kane halor ka jingïakhih jong ka VPP pyrshah ïa ka jingslem ban pyllait ïa ka tulop jong ki nongtrei ka Council.
U CEM ula kynnoh ba ka VPP kala pynlong ïa ka jingïakhih tad hadien ka jingïoh khubor ba ka Sorkar Jylla kan sa pyllait noh shen ïa ka song pisa sha ka JHADC.
“Ka paw kumba ka VPP kala buh ïa katto katne ki briew ban lum jingtip halor kane ka kam namar man ka por ba ka Sorkar Jylla ka mut ban pyllait ïa ka song pisa sha ka JHADC, ki briew ka VPP ki ju wan ban pynlong ïa ka jingïakhih ban pyni ba ka dei ka jingïakhih jong ka ba sa pyllait ïa ka pisa” ula ong.
“Ka Sorkar Jylla kala dep nadong hadong ban pyllait ïa ka song pisa hadien ba ngi la thoh ïa ka shithi. Kumta, kane kam dei ka jingshimkhia ka Prah, ka dei ka jingshimkhia jong ka EC jong ngi ban pynthikna ïa ka jinglait noh ka pisa na ka bynta ban siew ïa ka tulop ba sahteng jong ki nongtrei” ong u Bah Thombor.
Kat kum ka jingong jong u, ka Council ka donkam kumba T. 6 klur ban siew pynkhuid ia ka tulop ba 7 bnai jong baroh ki nongtrei.
Haba kylli, une u Khliehduh ka JHADC ula ong “Ngi khmih lynti ban ïoh kumba T.16 haduh T.17 klur mynta ka kynti (naka bhah khajna ki marpoh khyndew) bad ka Sorkar ka dang pynkhreh ïa baroh ki jingdonkam ba hap pyndep”.
Haba ïiew ïa ka jingïakhih ka VPP kum ka kam ka bym don jingmut, u Bah Thombor ula ong “ Wat lada ki wan ïakhih shisngi ne man ka sngi ruh, lada ka pisa ka don ngin siew noh ïa ka tulop hynrei haba ka pisa kam don, ngin ym lah leh eiei satia”.
Ula kynthoh ba ka jingïakhih ka VPP ka dei tang ka buit leh politics halor kane ka kam namar ba kala jan ka elekshon MDC.