Dawa ka Meghalaya na ka 16th Finance Commission ban kyntiew ïa ka bhah khajna sha ka 50 %

Shillong, Nailur 30 : Ka Meghalaya ka dei ka Jylla kaba phra ban dawa pynkiew ïa ka bhah khajna sha ka Jylla na ka khajna ka Sorkar Pdeng ba sam sha ki Jylla (divisible pool) sha ka 50%.
Ka Sorkar Jylla hapoh ka jingïalam u Myntri Rangbah Conrad K Sangma kala aiti ïa ka jingtyrwa ba shongdor T.1.2lak klur ka grants-in-aid na ka bynta san snem ha ka jingïalang ba la pynïaid da u Chairman ka 16th Finance Commission Arvind Panagariya, kaba long mynta ka Lah Sngi U Blei.
Haba kren bad ki lad pathai khubor, u Panagariya ula ong “Ka jingkwah ka Jylla ka long ban kyntiew ïa ka bhah naka divisible pool na ka 41% ba mynta sha ka 50%. Mynta, kane ka dei ka jingdawa ba ngi la ïohsngew na kawei ka Jylla sha kawei pat bad la paw ba ha kylleng ki Jylla kala don ka jingïakwah lang ba ka jingsam ïa ka khajna kan kiew na ka 41% sha ka 50%”.
Haba kylli la ki jingdawa jong ki Jylla ka long kaba lah ban pynurlong, u Chairman ula ong “Kane ka dei ka jingkylli kaba biang bha. Kane ka dei ka Jylla kaba phra bad ngi la ïohsngew lah phra sien ban pynkiew na ka 41% sha ka 50% na ka bhah khajna ka Sorkar Pdeng ban sam sha ki Jylla. Ha ka jingshisha, ka Commission ha ki snem bala leit kam pat ju shim ïa kane ka jingpynkiew kaba heh (41% sha ka 50%) namar ka dei kaba la bun bha”.
U Chairman ula pyntip ruh ba ka Sorkar Jylla kala aiti ïa ka jingtyrwa ba ai palat T.1.2 lak klur ka grant-in-aid na ka bynta ka 5 snem ban wan.
“Ka grant in-aid ka wan na ka consolidated fund jong ka Sorkar Pdeng. Kine ki dei kiba jyrwit jyrwat bha namar ïa mynta hadien jong ka 14th Finance Commission, ka jingsam ïa ka khajna ka Sorkar Pdeng ka long kaba la heh bha. Kumta ka Sorkar Pdeng ka la pyndonkam ïala ka bor la kan ai nala ka jong ka consolidated fund ne kan ai beit thik kat kum ki jingai jingmut jong ka Finance Commission” ula ong.
Hashuwa kane, u Chairman ula pyntip ba ka Commission kala sngewhun bha ïa ki jingai jingbatai jong u Myntri Rangbah ka Jylla Conrad K Sangma ha ka por ba u ai jingkren.
“Ka Jylla kala ai ïa ka jingbatai kaba biang palat” ula ong bad bynrap “ Ula pyni ïa ka jingangnud bad ka jing shimkhia jong u halor ka roi ka par jong ka Jylla. Ngi la ihun bha ïa kaei kaba ngi ïohi. Ka jingbatai dalade ka dei kaba la biang pura. Kala kdup ïa ki prokram bapher bapher kiba ïadei bad ka jingdon ki nongshong shnong, ka geography bad ki kam jngohkai”.
Halor ka jingbatai ia ka Mission 10 jong ka Jylla, u Chairman ula ong “Kawei ka bynta jong ka jingbatai ka dei ka jingïakren halor ka mission 10 kaba ka Jylla kala don ïa ka plan ba kynthup ïa ki prokram ba ka kwah ban pyntreikam bad ki jingaiti lut jong ka na ka bynta ki paidbah ka Meghalaya nalor ka jingbuh thong ka Jylla ban kynjoh ïa ka GDP ba 10 billion dollars hapoh u 2028 ka ban wanrah ïa ka per capita income ba jan kot ïa ka 3000 dollar, kaba dei kaba biang palat”.
Ha kajuh ka por, u Panagariya ula ong ba ka Commission mynta ka dang don ha ka khep ka jingïakren bad ki Jylla lem bad ki kynhun bapher bapher.
“Ka Meghalaya ka dei ka Jylla ba 8 ba ngi la leit ïuhkjat. Ngi la dep wan sha ki 7 tylli kiwei pat. Dang shen ngi la wan ha Assam bad ki Jylla ba marjan” ula ong.