Da ka song pisa ba 8hajar klur tam pan pisa ki lai District Council na ka Finance Commission

Shillong, Nailur 30 : Ki lai tylli ki Autonomous District Council (ADC) jong ka Meghalaya ba kynthup ïa ka KHADC, JHADC bad GHADC ha ka sngi Nyngkong ki pan ïa ka song kyrshan pisa kaba kaba 8877.51 klur tyngka na ka 16th Finance Commission na ka bynta ka samoi trei kam kaba san snem.
Haba kren bad ki lad pathai khubor hadien ka jingïakynduh ïa u Chairman ka Finance Commission u Arvind Panagariya, na ka liang u CEM ka KHADC Bah Pynïaid Sing Syiem u la ong ba na bynta ka GHADC ki la pan ïa ka song pisa kaba heh tam kata haduh 5042.30 klur tyngka, bud sa ka KHADC da 2,641.54 klur tyngka bad JHADC pat 1,019 klur tyngka.
Ha ka dorkhas ba ki lai ADC ki aiti ha u Chairman ka Finance Commission, ki la pan ruh ïa ka jingkyrshan pisa kaba 2 persen na bynta ki jingdonkam kyrkieh kiba lah ban mih (ADC Contigency charges) kaba long 174.07 klur tyngka.
Da kaba kam ba ka jingkynduh ïa Finance Commission ka long kaba seisoh, u CEM u la ïathuh ba ki lai District Council ki la kyrpad ruh ïa ka Commission ba kan mang kham bun ka Untied Grant naduh u snem ban wan.
“Kam dei shuh kum ha ka 15th Finance Commission, ha kaba ki ai kham bun ka Tied Grants,” u la ong. Katkum ka jingïathuh jong u ïa ka Tied Grants lah ban pyndonkam bunsien tang ha ki projek kiba ïadei bad ka um, ka koit ka khiah bad ruh ka khuid ka suba.
“Ngi shem ba ka long kaba eh shibun ïa ngi lada ki la buh kyrpang ïa ka jingpynïabynta ïa ki pisa ban pyndonkam. Teng teng, ngi donkam ïa kiwei pat ki projek na ka bynta ban pynbha ïa ki skul, ki kolej ne ki iing shnong ne kiwei kiwi hynrei ngi hap ban pynleit jingmut ha kiwei pat ki mat,” u la ong.
Kumta halor kane u la ong ban ym ïapyrshah halor ka jingpyntreikam ïa kine ki skhim pynroi, ki la ai jingmut bad ki la kyrpad ïa ka 16th FC ban kham pynbun ha ka Untied Grants, naba ïa ki untied grants ngi lah ban pyndonkam ha kiwei pat ki kam pynroi kiba tyrwa da ki nongïalam shnong lane ki nokma bad ki elaka. Ha kajuh ka por u CEM u la ïathuh ba ki ADC ki la kyntu ïa ka Commission ban pynthikna ba ka jingpyllait pisa na ka sorkar pdeng sha ki ADC ka dei ban long lyngba ka Ministry for Development of the North Eastern Region (DoNER) lane ka North Eastern Council (NEC) ym dei shuh na ka Ministry of Panchayati Raj (MoPR). .
“Ngi la pyntip sha ka commission ba baroh lai tylli ki ADC ki shaniah na ka bhah jong ka khajna ha ki marpoh khyndew ba kongsan kum u dewiong (ngi ïoh 25persen). Naduh ka jingkhang tih dewiong ka la don mynta la shiphew snem, ka JHADC bad ka GHADC kim lah ban siew tulop ïa ki nongtrei jong ki bad kane ka la ktah haduh katta katta ïa ki ar tylli ki ADC. Kumta ngi la pynpaw ïa kane ka mat sha ka FC bad ngi la kyntu ïa ka FC ba kan ai ïa ki jingkyrshan pisa na ka bynta ka jingtreikam ba man ka sngi jong ka Council na ka sorkar (revenue deficit budget grant).
“Ha ka jingshisha, kane ka jingai pisa ka dei ka jingai jingïarap na ka bynta kito ki jylla ne ki tnad treikam, ki bym lah ban treikam shuh namar ka jingduna khajna. Ngi la shah ktah ruh na kata kumta dei na kata ka daw ba ngi la pan hapoh kane ka revenue deficit budget grant kumta la kumno kumno ki lah ban ai kum ka jingkyrshan pisa ba shisien shisnem na ka bynta baroh 3 tylli ki ADC khnang ba ngin lah ban pynneh pynsah ïa ka jingtreikam kaba man ka sngi jong ka council bad ruh khnang ba kine ki jingbym lah siew tulop ïa ki nongtrei kin nym jia shuh ha ki snem ban wan,” u la bynrap shuh shuh.