Kyrshan ka NPP ban pynheh ïa ka bhah tyngka sha ki jylla kane ka thaiñ shatei lammihngi

Shillong, Nailur 30: Ka seng kaba synshar ïa ka sorkar ha ka jylla ka National People’s Party (NPP) ha ka sngi Nyngkong ka la kyrshan na ka ban pynheh ïa ka mang pisa sha ki jylla kane ka thaiñ shatei lammihngi, da kaba ithuh ïa kane ka thaiñ ïa jinglong kyrpang ka jaka, ki lad jingtei bad ki jingeh halor ka imlang sahlang bad ka ïoh ka kot.
“Kumjuh ruh ngi banjur ïa ka jingdonkam ban peit lang haba ïadei bad ki kam ba dang sahdien, ki jingduna ha ki kam jingtei, ka jinglong lum ka Meghalaya bad kiwei ki jylla kane ka thaiñ shatei lammihngi,” ong u nongaiktien ka NPP u Bah Himalaya Shangpliang haba kren sha ki lad pathai khubor hadien ka jingïalang jong ka 16th Finance Commission.
U la ong ba ka party ka kwah ïa ki special grant ban khmih ruh halor ki lad jingtei kaba dang duna ha Meghalaya, khamtam ka jingpynïasoh ki surok, ka koit ka khiah, ka pule puthi bad ki digital infrastructure.
Ka party ka la pynpaw ruh ha kaba ïadei bad ki jingjia ki jingshah pynjulor ha ki bor ka mariang, kum ka jingshlei um, ka twa khyndew bad kiwei ki lad kiba donkam ki jingïarap pisa.
U Bah Shangplaing u la ong ba ka NPP ka la banjur halor ka jingdonkam ki jingbei pisa kiba lah ban khmih lem ïa ki jingeh ha ki thaiñ nongkyndong bad ka bha ka miat ki riewlum, da kaba pynleit jingmut ruh ban kyntiew ïa ka ïoh ka kot ka kamai kajih lyngba ka rep ka riang, ki kam jingtei ha ki thaiñ nongkyndong, bad kiwei kiwei.
Ka NPP ka la dawa ruh ïa ka climate adaptation fund na ka bynta ka Meghalaya ban lah ban khmih ïa ki jingpom dieng pathar, ka jingduna ka umbam umdih ka jingtuid noh ka khyndew ba long sboh nalor ka jingpynneh ïa ka sawdong sawkun bad kiwei.
U Bah Shangpliang u la ïathuh ba ka NPP ka la kyrpad ba dei ban bteng ïa ka revenue deficit grant na ka bynta ka Meghalaya, da kaba banjur ïa ka jingshaniah ka jylla na ka sorkar pdeng bad ban khmih ruh ïa ka jingdonkam hapdeng ka revenue bad expenditure.
Haba ong ïa ka jingdonkam ka pisa ban pynheh ïa ki kam irrigation, farm mechanization bad value-added agriculture ha ki thaiñ nongkyndong ka Meghalaya, u la ong, “Ngi la kyrpad ïa ka finance commission ban mynjur ka jingbhah pisa kaba kham heh sha ki bor pynïaid shnong (panchayats bad municipalities) ban pynbha ïa ki kam synshar shnong bad ki jingshakri naduh tynrai.”
U la ong ba ka party ka la pynpaw ruh ïa ka jingdonkam ka jingbei pisa kaba khambun ban pynbha ïa ki jaka sumar ha Meghalaya, kynthup ïa ki tiar kiba bha, khamtam sha ki jaka ba kyndong eh.
“Shuh shuh ka party ka la kyrpad ban bei pisa ruh ban pynbha ïa ki jingtei ha ki skul, ka jinghikai ïa ki nonghikai, digital education ha ki thaiñ nongkyndong bad ki jaka riewlum. Ngi kyrpad ruh ka jingdonkam pisa haba ïadei bad ki lad jingtei ha ki kam jngohkai ha Meghalaya da kaba kdew ïa ka jingitynnad ka mariang bad kiwei ban kyntiew ïa ka ioh ka kot ka jylla,” u la ong.
Ka NPP ka la banjur ïa ka jingdonkam ka special grant kaba ïadei bad ka jingïoh kam ki samla lyngba ki skill development program ban lah ban shim khia halor ka jingkyrduh kam ha ka jylla bad kiwei kiwei ki jingkyrshan, u la bynrap.