Ka Shillong kadei ka smart city kumta donkam ruh ïa ki paidbah ban long smart, ong u ADC

Shillong, Nailur 30: Ka seng kiba ñiah thuk thuk ka TULBA ha ka sngi nyngkong ka la pynlong ïa ka jingpynsngewthuh paidbah halor ka Road Safety Cum Bike Rally ha Khyndailad bad ïa ka bike Rally la sdang na ISBT Mawïong ha ka por 10.30 mynstep bad la pynkut pat da ka prokram ba lyngkot pat ha Khyndailad.
Ha kane ka prorkam u ADC ka East Khasi Hills u Bah Ronnieson Wahlang u la long u kongsan ha ka jingdonlang u Bah F Shadap MVI Shillong, u Inspector Das Gupta Shillong Traffic Police, ki khynnah pule bad ki paidbah nalor kiwei kiwei pat.
Haba kren kum u kongsan u Bah Wahlang u la ong, “Ka Shillong kadei ka smart city bad kumta ka long ruh kaba donkam ïa ki nongshong shnong ruh kin long kiba smart kumta nga khot ïaphi ki khun samla ba lyngba ka Legend jong ka TULBA ban pynpriang ïa ka khubor sawdong halor ka bynta bad ka jingkitkhlieh ban nohsynniang halor ki lad jingïada ka nongbah Shillong, ka jingïada ka Meghalaya bad ka ri India ym tang ïa ki nongñiah hynrei kumjuh ruh ïa kiba ïaid kjat.”
“Ka long ruh kaba kongsan ban don ka jingkitkhlieh hapdeng jong ngi iwei pa iwei kumjuh ruh ha ki ïing ki sem bad kumjuh ruh ïa ka imlang sahlang. Ka nongbah kan ym lah ban kynjoh kum ka smart city lada ki nongshong shnong kim long kiba smart bha. Haba nga dang shong ha kane ka prokram nga ïohi ba ki briew ki hiar bad ki kiew kali na ki jaka ki bym dei bad kumta nga kyntu ïa ki nongshong shnong bad kumjuh ruh ïa ki nongñiah kali bad kidei ban pynhiar bad kyntiew nongshong kali na ki jaka ba la buh. Ngi ïoh ki jingujor ba ka nongbah Shillong ka la bthei da ka jingkhapngiah ka jingbun ki kali bad ka jingpynïaid kali ruh ka la long kaba eh bha naba ka jingbun ki kali ka la long shaba palat u pud uba la ima ban peit hynrei kane ka shukut noh tang ha ki jingujor lada ngim don ka jingkitkhlieh kaba nga maphi ngi dei ban don,” ong u ADC.
U la bynrap ruh da kaba ong, “Lada ma ngi ngi shim taxi na ki jaka ba dei, ban kyntiew bad pynhiar kali ha ki jaka ba la buh bad kumjuh ruh ban pynieng ïa ki kali ha ki jaka ba dei ban pynïeng nga thikna ba ka Shillong kan long ka smart city. Nga shim ïa kane kabu ban ïa khublei ïa ka TULBA kaba dei ka seng kiba ñiah thuk thuk bad ki kam shakri ba ki la leh, ki la leit na kawei ka jaka sha kawei pat ban hikai ïa ki nongshong shnong halor ka jingïada ha ka niah kali ha surok bad kiwei pat ki kam ba ïadei bad ka ñiah kali.
Lah ïoh ka jingkren na u Bah F Shadap MVI Shillong, u Inspector Das Gupta Shillong Traffic Police bad ka jingkren pdiang na u Bah Kyrshanlang Nongbri Working President TULBA bad kiwei pat ki prokram. Ki la don ruh ki jingthoh ba ong ba dei ban long kiba phikir, ka jingñiah kali kan long kaba ma lada khleh lang bad ka kiad bad kiwei kiwei.