Shillong, Nailur 30 : Ka United Democratic Party (UDP) ka la buh hakhmat jongka 16th Finance Commission na ka bynta ban kyntiew ïa kam kam pynroi sor ha ka jylla Meghalaya.
Hadien ka jingïalang jong ki seng saiñ pyrthei bad u Chairman ka 16th Finance Commission u Arvind Panagariya u General Secretary ka UDP u bah Jemino Mawthoh u la ong “ Haba ngi ïakren shaphang ki kam sor khamtam ha kaba ïadei bad kane ka nongbah Shillong ngi ïohi ba ngi la nang hiar kumta ngi donkam ban pyrkhat thymmai bad ngi donkam bun ki jingïarap na ka bynta ki kam pynroi sor”.
U la ong ba ka nongbah Shillong ka don hapdeng kiba bun ki jingeh naduh ka jnghangngiah , ka jingkiew ka tdem, jingbymdon ki jaka leit bar kiba khuid bad ka jingjaboh jabaiñ ka donkam ka jingiarap ba kyrpang na ka sorkar pdeng namar haduh mynta ka dang duna palat ka jingïarap na ka sorkar pdeng.
U la ong ba ka jingbym lah ban pynlong ïa ka election Municipal lah slem bah mynta ka dei kawei na ki daw kaba ktah jur ïa ka jingkiew jongka roi ka par hangne ha sor khamtam hangne ha nongbah Shillong. “ Kumta ngi sngew dei ban wan shakhmat da ki buit treikam ba pher bapher khnang ban lah ban weng ïa kine ki jingeh bad ngi donkam ruh ka jingkyrshan ba pura na ka sorkar pdeng ha ka liang ka pisa tyngka” ong u bah Jemino.
Ha kaba ïadei bad ka pule puthi u bah Jemino u la ong “ Ngi la kdew ruh shaphang ka pule puthi hapoh ka jylla bad kumno ba ngi la ïohi ba katba dang ïaid ki snem kata ka la nang hiar nang hiar. Lada phi phai sha ka nongbah Shillong shisien ha kawei ka por la tip ïa ka kum ka nongbah jongka jingnang jingstad namar ki samla pule ki wan na kylleng ki bynta ka ri ban pule ha kane ka nongbah khamtam lei lei na ki jylla kane ka thaiñ shatei lam mihngi ka ri India. Kumta kane ka dei kawei ka bynta kaba hap ban shim khia bha halor ki jingeh ha ka liang ka pule puthi bad phi kynmaw hi ba ki nonghikai ruh na ka por sha ka por ki hapban mih surok ban ïakhih na ka bynta ki hok jongki namar ka daw ka long ba duna pisa tyngka. Kumta kane ka dei kawei na ki mat ba ka UDP ka la buh hakhmat ka Commission”.
Ka UDP ka la rah ruh hakhmat ka Commission halor ka Disaster Manangement. U la ong ka Disaster Management Act ka dang treikam dang ha u 2005 bad ka policy pat dang ha u 2019 ha baroh kawei ka ri. “ Lada ngi ïakren shaphang ka jylla Meghalaya dei ha u snem 2003 haba ka United Nation Development Programme ka la wan paw ba sa sdang ïa kyndit bynriew. Kumta dang donkam bun kiei kiei ban leh na ka bynta ban pynkhreh kumno ban ai jingïada haba shah lyngshop ha ki bor mariang khamtam lada phai sha ka jylla bad kane ka thaiñ kiba hap ha ka lynti ïaid jongu jumai. Kumta ngi dei ki jaka ba don hapdeng ki jingma na u jumai bad nalor kata don sa kiwei kiwei ki jingshah lyngshop ha ki bor mariang kum ka eriong bad u phria, jingshlei um bad ter ter. Kine ki la nang kiew bad ïa kine ruh donkam ban shim khia kloi mynta”.
Ka UDP ka la ban jur ruh ïa ka jingdonkam ban ïarap pisa tyngka ka sorkar pdeng ban thaw ki lad kumno ban weng ïa kane ka jingkyrduh kam ki khun samla ha kane ka jylla Meghalaya.
La ïakren ruh halor ka kam jngohkai ha ka jylla namar kane ka kam ka long kaba kongsan kaba lah ban aikam ai jam kiba bun ki khun samla kumta ha kane ka bynta ruh ka donkam ka jingïarap pisa tyngka ka sorkar pdeng khnang ba yn ïoh ai jingïarap ïa ki samla ban seng kam seng jam” ong u bah Mawthoh.
