Shillong, Naitung, 20: Ka Food Corporation of India (FCI) North East Frontier Region (NEFR) lyngba ki jingïarap na ka Sorkar Pdeng ka la tei pynheh ïa ki thiar buh kew bad khaw khnang ban pynbun shuh shuh ïa ka jingkynshew marbam ha kane ka thaiñ Shatei Lammihngi.
Ka FCI NEFR, Regional Office, Shillong ka dei kaba peit ïa ka jylla Meghalaya, Tripura bad Mizoram.
Ha ka jingïakren bad ki lad pathai khubor ha ka sngi Palei u General Manager jong ka Food Corpporation of India (FCI), Regional Office, Shillong u S. K. Yadav u la ïathuh ba naduh ka 1 tarik, Naitung, 2020, baroh lai tylli ki jylla ki don ïa ki thiar buh marbam kiba ngiam tang 88,000 metric ton hynrei mynta la lah kyntiew sha ka 1,22,636 metric ton.
“Ngi la shna pynheh ïa ka kudam buh marbam ha ka NEF Region kaba la pynkiew palat 40 % ha ki lai snem ba la leit noh, kata, na ka 87070 metric ton sha ka 122636 metric ton. Kumba 88000 metric ton ka kudam buh marbam la pynkha lyngba ki skhim bapher bapher ha ka jylla Meghalaya, Mizoram bad Tripura da ka FCI,” la ong u Yadav.
U Yadav u la ïathuh ba ki nongrep ha Meghalaya kin ïoh ïa ki jingmyntoi lada ka FCI ka shna ïa ka Cold Storage khnang ba kin dup lah ban buh shipor ïa ki mar rep.
Ïa mynta, ka Jylla Meghalaya ka don ka thiar kaba ngiam 39326 metric ton.
Ha u snemn baladep, la lah ban buh ïa u khaw bad u kew 2500 metric ton ha ka thiar ha Baghmara, South Garo Hills, 5000 metric ton ha Byrnihat, Ri Bhoi District bad 5000 metric ton ha Sohryngkham, East Khasi Hills District bad nalor kata la ki don ruh ki thiar kiba dang shna pynheh ha Sohryngkham, East Khasi Hills District kiba lah ban ngiam 5000 metric ton bad 2500 metric ton ha Tura.
U la ïathuh ba ka FCI ka la khot tender lyngba ka PEG Scheme ban shna ïa ka thiar ha Mendipathar kaba ngiam 5000 metric ton, 5000 metric ton ha Nongstoiñ, 2500 metric ton ha Khliehriat, 3340 metric ton ha Sohra bad 3340 metric ton ha Zikzak Block.
U Yadav u la ïathuh, lyngba ka Open Market Sales Scheme Domestic (OMSS(D) Scheme ïa u khaw bad u kdew la die lilam ha iew manla ka taiew khnang ban pynneh ïa ka dor ka mur jong kine ki ar jait ki marbam khnang ba ki paidbah bad ki nongthied nongpet kin ïoh jingmyntoi.
“Ngi la pyllait ruh kumba 7.5 Lakh Metric Tons ki marbam kum u khaw bad u kew khlem jingohdor lyngba ka Pradhan Mantri Garib Kalyan Anna Yojana (PMGKAY ) Scheme naduh u bnai Ïaiong, 2020 haduh u bnai Nohprah, 2022. Ka jingsam kaba shi spah na ka shispah ïa u khaw ba la khleh vitamin ne Fortified Rice hapoh ka NFSA, bad kiwei kiwei skhim jingmyntoi bad ka OMSS (D) khnang ban pynthikna ba ki paidbah kin ïoh ïa ki marbam kiba bha,” la bynrap u Yadav.
