Shillong, Naitung, 20: Ka Kynhun Myntri jong ka Sorkar Jylla ha ka sngi Palei ka la mynjur ïa ka Meghalaya Taxi Aggregator Operational Rules ban pyrkhing da ka aiñ ïa ki thuk thuk ar shaka kiba kamai hapoh ka Jylla.
Ha ka jingïakren bad ki lad pathai khubor, u Myntri Rangbah ka Jylla u Conrad K. Sangma u la ong,“la mynjur ïa ka Aiñ naduh u snem 2020 hynrei ym pat lah satia ban shna ïa ka Rule bad mynta khatduh ïawai ngi la lah ban thaw ïa ki Rule.”
Katkum ka Rule, ka dor jong ka laisen na ka bynta ki Company Aggregators kan long T. 700 shi snem kawei ka thuk thuk ar shaka ne kali bad ka dor jong ka bai Permit kan long T.300, lada ki treikam ha ki jaka ba la buh, kata ha ki nongbah lane ki distrik ne ki thaiñ bad lada ki ïaid sha baroh kawei ka jylla, ka dor kan long T.T. 1300 na ka bynta ka laisen bad T. 200 ka bai Permit, ula ong.
U la bynrap, ka Sorkar ka la buh ruh ïa ka dor na ka bynta ki nongleit jingleit. Ka dor ba la tyrwa ka long T. 10 na ka bynta shi kilometre bad sa T.5 ynda la ïaid sa shi kilomitar bad ka bai pynap ne ka Holding Charge kan long T. 4 na ka bynta 5 minit. Kane kan long ruh na ka bynta ki Bike Taksi.
U Myntri Rangbah u la ong ba ki Taxi Aggregators ki dei ban pynthikna ba kin don ïa ka App, GPS, Registration bad kiwei kiwei.
“Ka jingpynithuh ïa u nongniah dei ban pynbiang nadong shadong, ki lad jingïada dei ban buddien ïa manla ki thuk thuk bad kine ki dei ki katto katne ki kyndon ba la pynrung ha Meghalaya Taxi Aggregator Operational Rules.”
Katkum ka jingong jong u, ka Sorkar kan leh da kaba tyngeh lada ki nongpynïaid ne ki nongñiah ki ohdor tam na ki nongleit jingleit.
