Tang kiba ïoh lum jingtip don 515 ngut kiba ngat ha u ñiangkulia ha Ri-Bhoi, sa katno kiba dang rieh

Nongpoh, K’lyngkot 11: Kumba la pynpaw da ka Meghalaya Aids Control Society kaba dei katkum ka jinglum jingtip ne lap hadien ba la bishnar bniah bha da ka tnad ka koit ka khiah, ki briew kiba la ngat ha u ñiangkulia ha Ri Bhoi District ki la kot sha ki 5115 ngut bad 23 ngut ki dei kiba dang lap thymmai bad ka jingkylli ka mih hangne pat lehse dang don shibun kiba la shah ktah ha une u ñiangkulia kiba khlem wan ban shah bishar bniah ha ka tnad ka koit ka khiah.
Kum ban pynkynmaw, ka Meghalaya Aids Control Society lyngba ka tnad ka koit ka khiah ki la shim khia ban ïa khun pyrshah na ka bynta ban pynduhjaid na ka jingbit une u ñiangkulia sha kiwei pat kiba ym pat shah ktah, da kaba la pynlong ïa ka Integrated Health Campaign ha kaba dang shen la pynkut noh ha Ri Bhoi District, hynrei kumba la paw ha ka kaiphod ba la pynpaw da ka Meghalaya Aids Control Society ka long ka khubor kaba sngewsih ba tang ha Ri Bhoi District ki la kot haduh 515 ngut kiba la ngat ha utei u khñiang ñiangkulia.
La ioh jingitip ruh ha katei ka Integrated Health Campaign ba la pynlong da ka Meghalaya Aids Control Society kaba la sdang naduh ka 17 tarik u Risaw 2023 bad la pynkut noh ha ka 9 tarik u Kyllalyngkot 2024, ki briew kiba la wan ban shah bishar bniah ha ka tnad ka koit ka khiah ki la poi haduh 6871 ngut bad kumba la pynpaw pat ha ka kaiphod ki don haduh 515 ngut kiba la ngat u ñiangkulia bad 23 ngut ki dei kiba dang shu lap thymmai.
Haba kren halor kane ka jingsaphriang jong une u khñiang jingpang, ka sorkar na ka por sha ka por ka ju pynshlur ïa ki paidbah ba ki dei ban wan shakhmat ban shah bishar bniah lyngba kit kor ki bor ban tip ïa kito kiba la ngat ha utei u khñiang jingpang bad kumba paw pyrthei wat la ka sorkar ka la ïaleh thma ban pynduhjaid ïa une u khniang jingpang dang duna pat kita kiba wan shakhmat ban shah bishar bniah ha ka tnad ka koit ka khiah.
Haba kren kyllum halor ka jingdon jong kitei kiba la shah ktah ne ngat ha utei u khniang jingpang, lehse bun kiba dang kheiñ sting bad ki lehrain ban wan shakhmat sha ka tnad ka koit ka khiah ba ki bishar bniah bad lada bun kiba ym shim khia ka jingma ka ap ïa kiwei kiba dang khuid, namar une u khñiang jingpang u dei u khñiang jingpang ba kloi ban pur sted sha kiwei khamtam lada ym phikir ïa ka shongkha ka shongman.
Kumba ka sorkar ka pynshlur ban wan shakhmat ban phah khmih bniah sha ka tnad ka koit ka khiah ban lap ne paw hadien ba la khmih bniah, la donkam ba ki paidbah kim dei ban lehraiñ bad kin wan shakhmat ban phah khmih bniah ha ka tnad ka koit ka khiah bad dei tang kata ka lad kaba ngi lah ban ïada na ka jingpur sted une u khniang jingpang sha kiwei ba kum ki paidbah ki donkam ban phikar ba ka sorkar jylla lyngba ka tnad ka koit ka khiah ka ju ïalap ne ai jinghikai ïa ki lad jingïada ban lait na une u khñiang jingpang.