Nongpoh, K’Lyngkot 11: Ka Synjuk ki Rangbah Shnong Ri-Bhoi District mynta ka sngi kala pynpaw ka jingsngewkhia halor ka jingbym don u Block Development Officer ba pura ha Umsning C&RD Block bala buh jingeh ïakiba bun ki Rangbah Shnong ban pyndep ïaki kam ki jam khamtam ha kaba ïadei bad ka pisa ka pilaiñ.
Haba kren sha ki lad pathai khubor mynta ka sngi naka liang u Bah BB Makdoh Chairman ka Synjuk ki Rangbah Shnong Ri-Bhoi District haka jingdonlang u Bah Teibor Makri Rangbah Shnong Mawkhan, Moris Lyngdoh Rangbah Shnong Umjarasi, Vicky Syngkli Rangbah Shnong Iewmawlong u la ong ba kum ka Synjuk ki pynpaw ka jingsngewkhia ba tang haki 5 bnai haduh 4 ngut la pynkylla ïaki BDO ha Umsning C&RD Block.
U la ong ruh ba haduh mynta ym don u BDO ba thikna ban shimti pura ïaka kam bad u BDO ba la thung mynta ruh u dei ba shu thung tang shipor bad um don bor ha kaba ïadei bad ki kam pisa khamtam ba kum ki Rangbah Shnong na kylleng ki shnong kila donkam ïaka pisa ha kaba ïadei bad ki skhim bapher bapher naduh ka SRWP, MP skhim bad kumjuh ruh ka skhim MNREGA ba dei ban ioh naduh shuwa ka Khristmas.
U la ong ruh ba ka jingkylliang BDO ha Umsning C&RD Block kala long shaba palat bala buh jingeh ïakiba bun ki Rangbah Shnong ban pyndep ïaki kam ki jam namarkata naka liang ka Synjuk kala dawa naka sorkar ba ka dei ban thung mardor da u BDO ba pura u ba lah ban trei pura bad thikna ïaka kam bala bynshet ban pynsuk ïaki paidbah kiba leit donkam ha katei ka ophis treikam sorkar.
