Long kiba shlur ban wad jingtip ïa ki skhim kiba ka sorkar ka la mang : AK Tiwari

Mawkyrwat, K’lyngkot 11: Ka ophis jong u Block Development Officer (BDO) jong ka Mawkyrwat C&RD Block ryngkat bad kiwei ki tnad treikam jong ka sorkar hapoh ka South West Khasi Hills District mynta ka sngi ki la pynlong ïa ka awareness programme kaba hap hapoh ka Jan Jatiya Gaurav Divas Campaign, Hamara Sankalp Viksit Bharat Yatra ha madan jong ka Upper Primary School, Pyndenumjaraiñ, South West Khasi Hills District.
Ha kane ka prokram u A.K. Tiwari, IRS, Deputy Secretary jong ka Sorkar India uba long ha kajuh ka por u District Prabhari Officer na ka bynta ka South West Khasi Hills District ki la ïa donlang kynthup ïa u bah I. Lawrynñiang, MCS, Block Development Officer (BDO), Mawkyrwat C&RD Block, lem bad ka jingïadon bynta lang ki nongtrei jong kiwei ki department.
Ïa ka prokram ha kane ka sngi la sdang da ka khubor na u Myntri Rangbah Duh ka Ri ba la pynbud da ka jingpynbam smai ne ka kular (Hamara Ankalp Viksit Bharat Yatra pledge) da u Block Development Officer, Mawkyrwat C&RD Block u bah I. Lawrynniang bad ka jingkren lyngkot na u bah Kynsailin Snaitang, District Programme Manager (DPM) jong ka ophis DRDA, South West Khasi Hills District.
Ha ka jingïalang ba lyngkot, u A.K. Tiwari, IRS, Deputy Secretary jong ka Sorkar India ha ka jingkren jong u, u la pyntip ba ka sorkar India ka la pynmih shibun ki skhim kiba ka jingthmu ka long na ka bynta ka jingmyntoi jong u paidbah. Ha kajuh ka por u la pynshlur ïa ki paidbah ban wad ïa ki jingtip ha kaba ïadei bad ki skhim bad ki prokram bapher bapher kiba ka sorkar ba ka ka la mang na ka bynta ban kyntiew ïa ka ïoh ka kot jong ki bad ka ban ai jingmyntoi ïa ka imlang sahlang.
Ha kane ka sngi la sam ruh ïa ka syrnod sha ka Kiewshaphrang Self Help Group (SHG), Pyndenumjarain bad pynbud ïa ki jingkren lyngkot na ki nongïoh myntoi halor ka jingïaid lynti jong ki ha kaba ïadei bad ka National Rural Livelihoods Mission (NRLM), Pradhan Mantri Awas Yojana- Gramin (PMAY-G), Job Card Holder bad ki nongïoh myntoi na kiwei pat ki department.
Shuh shuh la pynbud de ïa ka jingai jingpynshai paidbah ha kaba ïadei bad ki skhim jong ka sorkar da ki nongtrei jong ki department bapher bapher kynthup ïa ka Public Health Engineering, ka ophis jong u Deputy Commissioner (Supply), District Medical & Health Officer, ka National Rural Livelihoods Mission (NRLM), Banks bad Integrated Child Development Services (ICDS) bad na ka ophis u Superintendent of Fisheries. Nangta, ka la don ruh ka jingai jingsumar ei ne ka Free Medical Camp bad Health Screening da ki nongtrei ka koit ka khiah bad ka jingpynrung kyrteng ha ka Ayushman Bharat- Pradhan Mantri Jan Arogya Yogana, LPG Gas, bad kiwei kiwei.
Ïa ka jingïalang la pynïaid da u bah Khrwakupar Kharsyiemlieh, Gram Sevak, bad ka jingkren pdiang sngewbha na u bah Stalin Roy Thongni, Sordar Shnong Pyndenumjaraiñ.