Ki kam bishni bad ïashrut bunsien ki wanrah ka jingïapait ïapra, kyntu u MLA ïa ki VO ban ïa tylli
Nongpoh, K’Lyngkot 11: Ka kynhun Kper Sara Village Organisation kaba kdup kumba 13 tylli ki SHG haka shnong Umling Ri-Bhoi District, mynta ka sngi ka la rakhe kyrpang ban pynsah jingkynmaw halor ka jingdap kaba ar snem jong ka jingïaid lynti ka kynhun naduh bala seng ïaka ha u snem 2022 da ka jingangnud ban kyntiew ïaki longkmie kaba dei ruh ka thong jong ka sorkar kmie bad ïa katei ka jingrakhe la pynlong ha ïing Dorbar ka shnong Umling.
Katei ka VO tang hapoh ka 2 snem jong ka jingïaid lynti ka la lah ban thaw haduh 13 tylli ki SHG hapoh jong ka, ban seng ïaka kynhun ki longkmie ba kin ïeng ha la ki kjat na ka bynta ban seng kam lajong bad haka jing ïaid lynti kaba 2 snem katei ka Village Organisation ka leh shibun ki kam ki ba bha bad ki kam shakri paidbah hapoh katei ka Shnong khamtam ban kyntiew ïaki para longkmie da kaba ai ram bad ka jingkynshew pisa.
La ioh ruh ban ot ïa u cake ha katei ka sngi kum ka dak ka jinglehkmen ha kaba u MLA ka Nongpoh Constituency u Bah Mayral Born Syiem u la shim bynta kum u kongsan haka jingdon ryngkat
U Bah Balajied Ranee MDC ka Nongpoh, Kong Bidaliancy Syngkli President Kper Sara VO Umling, kong Shimtihun Makri Secretary VO, Bah Comenson Wahlang Rangbah shnong, Bah Tony Rymbai CC ka Umling Block, Bah Augustin Wahlang Asst. Rangbah Shnong lem bad kiwei kiwei.
Haba kren ha katei ka sngi naka liang u Bah Mayral Born Syiem u la ai mynsiem ïaki nongïalam ka VO bad ki SHGs bapher bapher ha katei ka sngi ba kin dang lah ban trei shitrhem kham bha shuh shuh naka bynta ka jingmyntoi jong ki longkmie bad kumjuh ban wanrah ki jingkylla haka shnong ka thaw hi baroh kawei, ba kin lah ban seng ïaki kam ki jam, ban ïeng hala ki jong ki kjat bad kumjuh ban dang lah ban kner ïaki jingïarap sha kiwei pat ki para longkmie.
U la kyntu ruh ïaki longkmie ha katei ka sngi haba ki trei ïa kino kino ki kam ki dei ban trei da ka jingieid ym ban don ka mynsiem ïa bishni lane ïashrut namar kine ki daw baroh ki wanrah ka jingïapait ïa pra, hynrei kum ki longkmie hapoh ka shatri jong ka Kper Sara VO kum ka kyrteng ki dei ban da sara haka rukom kaba dei bad ban pynmih ïa u soh ka jingjop ha kano kano ka kam kaba ki trei.