Nongstoiñ, Nailar 25: Ka Voice of the People’s Party, ka seng saiñ pyrthei kaba thymmai mynta ka sngi ka la hiar sha Langpih ban pynlong ïa ka jingïalang pynshai paidbah ïa ki nongrim jong ka seng.
Ha kane ka sngi u bah Ardent Miller Basaïawmoit president rangbah ka VPP, u bah Adelbert Nongrum MLA ka North Shillong, kiwei kiwei ki riew pawkhmat jong ka seng VPP bad ki riew rangbah jong ka thaiñ Langpih, ki la ïadonlang ha katei ka jingïalang ïa kaba la pynlong ha phyllaw jong ka skul Raidmynsaw Upper Primary School Langpih.
Ha kane sngi ka seng na katei ka 33 Rambrai Jyrngam konstitwensi, ka VPP ka la ïoh ban pynrung dkhot ruh kumba san spah ngut tam ki paidbah kiba la wan ban pynïasoh hi ïalade ha katei ka seng VPP hadien ba la kut ka jingïalang.
U bah Ardent haba ai jingkren u la ong ba ka shynshar khaddar kaba khuid ka dei ka thong kaba kyngkong eh jong ka Voice of the People’s Party. Ym tang katta hynrei u la ong ruh ba dei tang ka jingïatylli ka ban long ka atiar ba lah ban pynkhlaiñ pat ïa ka jaidbynriew.
U bah Ardent haba kren ha katei ka jingïalang u la ong ba sanphew wei tylli ki snem ki la ïaid, hynrei ki paitbah ki dang don ha ka jingsyier ka jingsmiej, ki dang sah ha ka jingduk jingkyrduh bad ka jingbiej.
U la ong ruh ba ha ki snem ba la dep ka jaitbynriew, ka la sei ïa ki nongïalam kiba sngew tynnad ban pynpait pynpra ïa ki shnong ki thaw bad kiba wanrah ruh ïa ka jingsngewïapher kynhun ha ka jaitbynriew. Hynrei, ka VPP ka kwah ban hikai ïa ki paitbah ban wanrah ïa ka jingïatylli ha ki shnong ki thaw bad ka jaitbynriew.
Nalor kata u la ong ruh ba ka jingshaniah ha u Blei lyngba ka jingïatylli kam don jingmut ban kyrhuh sha ki paitbah. U la ong ruh ba ka VPP ka don ki riew rangbah bad ki khraw pyrkhat ki bym kwah ban kyrsum ha ka politik.
Hynrei ki paitbah ki hap ban wan sha ka VPP, namar ki sngewthuh ba ka don ïa ka saiñdur bad ka jingpyrkhat kaba thymmai, na ka bynta ban wanrah ïa ka synshar khaddar kaba khuid bad ka jingshakri kaba beit bad kaba khuid na ka bynta ka ri bad ka jaitbynriew.
