Tang ha ki jaka ba don jingkulmar yn buh ïa ki CRP, lait ka Langpih : Bah Paul Lyngdoh

Shillong, Risaw 06 : U Myntri ka sorkar jylla, Bah Paul Lyngdoh ba dei ruh u Chairman jong ka Regional Committee pynbeit pud jong ka West Khasi Hills ha ka sngi Thohdieng u la pyntip ba ka jingbuh ïa ki CRPF ha ki khappud kan dei tang ha kito ki jaka ba don ka jingïakajia lane kiba don jingma ba lah ban mih jingkulmar.
Katei ka jingkren jong u Myntri kadei halor ka jingkylli la ha Langpih ruh ka sorkar kan buh neem ïa ki CRPF ban pahara katba ka jingpynbeit pud ka dang ïaid.
“Kumba long mynta hi, ka jingbuh ïa ki CRP kan dei tang ha ki jaka ba don ki jingkulmar bad kiba lah ban mih ki jingkulmar. Katkum ki jingtip ba ngi ïohlum haduh mynta, kim kdew satia ba kin mih kino kino ki jingkynad kumta kam donkam satia ïa kine ki bor pahara,” u la ong.
Haba jubab pat halor ka jingkylli, halor ka jingdon ki sengbhalang ba pyrshah ban buh ïa kitei ki bor pahara ka sorkar pdeng ha ki jaka kajia pud ka Meghalaya bad Assam u Myntri u la ong, “Lada phah ïa ki pulit Meghalaya ka Assam kan pyrshah bad lada phah ïa ki pulit Assam ka Meghalaya kan pyrshah. Lada phah ïa ki bor pahara jong ka sorkar pdeng kin don ki kynhun seng kiban pyrshah bad lada ngim phah ïano ïano ruh kin sa pyrshah. Kumta ïano ngin phah, hato ngin shu ieh kumto ïa ka jaka khlem pahara namar kat kaba leh yn pyrshah.”
U Bah Paul u la ïathuh ruh ba haba ïadei bad ka jingpynbeit pud ha West Khasi Hills ki khmih lynti ba la kumno kumno yn lah ban pyndep noh ha shwa u Risaw kata kynthup naduh ka jingleit jurip ïa kito ki jaka bad haduh ka jingaiti ïa ki kaiphod.