Byrnihat, Risaw 05: Hapdeng u paidbah uba da ki hajar ngut ha ka jingïalang ha Byrnihat, u President ka ka VPP, u Bah Ardent Miller Basaïawmoit u la ong ba ki paidbah ha shuwa ka elekshon ki ïa beh sha ki briew kiba lah ban ai pisa bai dawai, bai kot, bai kyiad, hynrei hadien ba ladep ka elekshon pat ki wan wad ïa ki MLA ka VPP ban kren ïa ki jingeh jong ki ha Assembly.
“Por elekshon te kiba bun kim patiaw ïa ka jingkhot jong ngi, hynrei ki ïa beh sha kaba ïoh pisa, ïoh kyiad, ïoh bai bos leit bam khana, hynrei mynta hadien ka elekshon pat kiba bun ki wan sha ngi ban pynkren lem ïa ki jingeh jong ki”, la ong u Bah Ardent ha kane ka jingïalang, kaba long lehse ka jingïalam kaba bun briew tm naduh ba ka VPP ka la leit kylleng kylleng ki shnong ban pynshai ïa ki nongrim badban pynrung dkhot.
U Bah Ardent ryngkat ka jingïadon lang u Dr. Ricky AJ Syngkon, General Secretary bad kyrtong MP ka Seng, nangta u Bah Brightstarwell Marbañiang, MLA Mawlai bad kiwei kiwei de ki nongïalam ka Party, u la batai pynshai ïa ki paidbah halor ki nongrim jong ka Seng da kaba ong ba ka jylla mynta ka donkam ïa ka jingkylla bad ka jingkylla kadei sha ka jingsynshar kaba khuid ba suba kaban pyllait ïa ka jylla na ka jingbamsap, na ka jingduk jingkyrduh.
U la ong ruh ba ka jingpdiang sngewbha ki paidbah kat shaba leit ïa ki nongïalam jong ka Seng ka pynkmen ïa ki bad kadei ruh ka jingleh phylla U Blei ha kaba naduh ki khunlung khynnah, ki bym pat lait kren bha ruh ki wan bud ïa ki kmie ki kpa sha ki jingïalang.
“Ngim ong ba kane kadei ka jinglah jong ngi, hynrei ka don ka kti na sha lyndet kaba pynïaid ïa kane”, la ong u hehduh ka VPP.
Lah ban kdew hangne ba mynta ka sngi, ha kiba bun ki jaka jong ka jylla ka la don ka jingther slap bad ka jingbeh ka lyer, pynban ha Byrnihat ym shym la don slap satia bad ka bneng ruh ka tngen bha. La ïohi ruh ba da ki hajar ngut ki paidbah ki la ap lypa ha ka jaka long jingïalang ïa u Bah Ardent bad ki nongïalam ka VPP bun kynta shuwa ban sdang ka jingïalang.
La pynlong ruh ïa ki prokram da ka shad ka kmen da ki sur tynrai. Nangta ka jingiakhublei kti badu Bah Ardent bad ka jingïashon dur bad u khlem don jingpynwit eiei na ki bor ka mariang, wat haba ka IMD ka la pynbna ïa ka Meghalaya kum ka Orange Warning ne ka jingmaham ba lah ban jur slap.
