Ngi sngew dap ram ïa ki nong Lapangap, kiba la shlur ban ïeng ïada ïa la u pud u sam: HYC

Shillong, Risaw 05: “Ngi sngew dap ram ïa kine ki paradoh parasnam kiba mad jynjar bad kordit lyngba ka jingpynwit ki paidbah Karbi hynrei kiba ïai ieng shlur pat ban ïada ïa la ka bri ka khyndew ka shyiap”, la ong u Bah Robert Kharjahrin, President ka Seng HYC.
U Bah Robert u la pynpaw ïa kane ha ka jingleit jngoh ïa ki paidbah ka Shnon Lapangap,ka Shnong khappud ha West Jaiñtia Hills District, kaba la don ka jingïaleh ban ïada la u pud u sam bad ka khyndew ka shyiap bad ki nong Karbi bad Pulit Assam ha kine ki sngi baladep.
Ka Seng ryngkat ka jingsynran lang ki nongïalam ka HYC Jaintia Hills District hapoh ka jingialam jong u President, Bah Robert June Kharjahrin bad u General Secretary ka CEC, Bah Roy Kupar Synrem  mynta ka sngi ki la hiar sha Lapangap ban ïakynduh ïa ki Nongialam Shnong bad ki Nongshong shnong kum shi bynta ban ai mynsiem bad kumjuh ruh ban ai khublei ïa ka jingshlur ka jong ki ban ïeng ïada ïa ka khyndew ka shyiap bad la u pud u sam.
U Bah Robert u la ong ba ka jingleit ka Seng sha kane ka Shnong ka long ban wan ai khublei bad kumjuh ruh ban ai mynsiem ïa ki ba kin nym sngewtieng sngewsmiej wat hapdeng kane ka jingeh hynrei kin ïai ïeng ban ïaleh bad na ka liang ka Seng ka kular ban don ryngkat bad ki ha man ki por bad ki khep ba ki donkam ïa ka Seng.