Tang da ka Cycle pyndep u Samla na Madhya Pradesh ban shang haduh 18 tylli ki jylla ha India

Nongpoh, Naitung 21: Kum uwei na u Samla na ka jylla Madhya Pradesh bad uba dei ruh u nonghikai ba la iehnoh kam na ka kam nonghikai ban pyndep ïa ka jingangnud jong u, u Samla Mehul Lakhani tang hapoh 2 snem u la lah ban poi haduh 18 tylli ki jylla ka Ri India tang da kaba ïaid da ka Cycle halor ka jingangnud jong u ban wan rah ka jingkylla ha ka ri India kaba hakhmat eh ka long ban ïalap halor ka koit ka khiah jong ki nongshong shnong ka ri India.
Une u Samla Mehul Lakhani u dei na ka jylla Madhya Pradesh ha kaba u la sdang ïa kane ka kam ban ñiah Cycle naduh ka 21 tarik u Jylliew 2021 hadien ba u la iehnoh kam noh kum u nonghikai ha Madhya Pradesh, ha kaba u la shim ruh ka rai ban shang kylleng ka ri India ban ïalap halor ki jingangnud jong u ban wan rah jingkylla hapoh ka ri India.
Haba la ioh ban ïa kren mynta ka sngi, naduh katei ka tarik kaba u la mih na Madhya Pradesh u la dep ban wan poi haduh 18 tylli ki jylla ka ri India ba ka jingïaid lynti ka la kot sha ka 42,000 Kilometers bad ki jylla kiba u la dep ban ïaid suwari ki kynthup ïa ka jylla Madhya Pradesh, Maharashtra, Goa, Gujarat, Daman Deep, Rajasthan, Uttar Pradesh, Chhattisgarh, Odisha, Jharkhand, West Bengal, Assam, Arunachal Pradesh, Nagaland, Manipur, Tripura, Mizoram, Meghalaya bad mynta na ka jylla Meghalaya u thmu ban ïaid pat sha ki bynta jong ki jylla ba hap ha ka North India.
U la ïathuh ruh ka daw kaba la pynlong ïa u ban shim ïa kane ka bynta kum u nongñiah Cycle ban ïaid kylleng ki jylla ka ri India, ka dei namar ba u angnud ban ki nongshong shnong ka ri India ki dei ban sngewthuh ïa ka dor jong ka jingkoit jingkhiah, ka jingkordor ban ïada ïa ka mei mariang bad kumjuh ruh ban pynneh pynsah ïa ki riti ki dustur bad ban tip ïa ki jingkhraw jong ka ri India naduh hyndai hynthai (Glorious history of India).
U la ïathuh ruh ha ka jingwan poi ha ka jylla Meghalaya, u la ioh lad ban leit iuh kjat ka ïingsah jong u Lat ka jylla, ka Meghalaya High Court, ka Meghalaya Legislative Assembly, ka State Museum bad ki skul bapher bapher hapoh ka jylla Meghalaya ban pynpaw ka thong kaba u la wan shang kylleng ki jylla tang da ka Cycle.
“Haba nga ïaid kylleng ki jylla ka ri India, na la ioh lad ruh ban ïa kynduh ki myntri sorkar ka sorkar pdeng, ki heh sorkar bapher bapher bad nga la leit iuh kjat ruh ha ki skulbah bapher bapher ka ri India bad tang ha kane ka jingïaid lynti ba 2 snem nga la ioh lad ruh ban thung haduh 5000 tynrai ki dieng shi bynta ban pynneh pynsah ïa ka mei mariang” ong u Samla Mehul Lakhani bad la tip ruh kum u Mehul Bharat Yatri.
Nalor shibun ki jingangnud kiba u la ïaid lynti kum uta u nongniah Cycle, u Mehul Lakhani, u la kren ruh halor ka jinglong jingman hapoh ka jylla Manipur, ha kaba u kyntu jur naduh ka sorkar Manipur bad ruh ka sorkar kmie ba kin shim ïa ki lad ki lynti ban pynkut noh ïa katei ka jingïaumsnam hapoh katei ka jylla.
U la ong ruh kum ki samla ngi dei ban trei na ka bynta ban pynkhlaiñ ïa ka ri baieit jongngi, da kaba wan rah ïa ka jingumsnam kan nym wan rah jingmyntoi, hynrei kan pynjah burom ïa ka jylla bad ka ri bad khamtam ka jingïapynïap, ka jingïapynjot ïa ki ing ki sem, ki ophis sorkar kane ka pynduhnong shibun bad ka wan rah ruh shibun ki jingduhnong kaba ktah ïa ka jylla bad ka ri hi baroh kawei, u la bynrap.
Shuh shuh, haba wan poi mynta ka sngi ha Nongpoh, ïa une u samla pdiang burom ruh da ka Kong Marian Maring, kaba dei kawei na ka longkmie ha Ri Bhoi, ha kaba ki la pynkup burom ïa une u samla bad ai mynsiem ruh halor ka thong kaba u angnud ban wan rah jingkylla ha ka ri India bad na ka liang ka Kong Marian Maring ka la kner ruh ïa ki lad jingïap kum ka bam ka dih bad ka jaka sah shipor shuwa ba un mih ban leit phai sha ki bynta jong ka North India.