Jyllei ki bar jylla ha ka thaiñ Umsning, maham ka KSU ïa ki nongïalam shnong ba ai syrnod kulmar

Nongpoh, Jylliew 05: Ka Khasi Student Union, Umsning Circle ka la pynpaw ka jingsngewkhia halor ka jingkharoi ki bar jylla ha ki shnong bapher bapher ka thaiñ Umsning, hadien ba ka seng ka la lum jingtip hadien ba bun na ki shnong kila ailad ïa ki bar jylla ban rungkhlieh bad ban ai syrnod ba kin ioh Epic ban shim bynta ruh wat ha ka kam saiñ hima sima.
Haba kren sha ki lad pathai khubor mynta ka sngi ha Umsning, u Samla Lester Nongbet President ka seng haka jingdonlang ki dkhot u la ong hadien ba ka seng kala lum jingtip, ka dap da ka jingsngewkhia kab jur bad sngewsih ba haduh u snem 2025 ki don haduh 2797 ngut ki bar jylla kiba la ïoh Epic ha ki shnong bapher bapher ka Umsning Constituency.
U la ong ruh ba kum ka seng kam kynnoh ïano ïano hynrei ka la kyntu bad maham ruh ïa ki nongïalam shnong kiba ju mlien ban kdup bad ai syrnod ïa ki mynder ba kin sangeh noh namar ka jingma ka ap ïa ki shnong ki thaw ba mynta kitei ki bar jylla kila sdang ban ioh bsuh bad shimbynta wat haka kam saiñ hima sima.
Na ka liang u Samla Lester u la ong ruh ruh ba napdeng 115 tylli ki shnong, 37 tylli ki dei ki bym don bar jylla wat tang uwei ruh bad kane kala pynkmen ha kawei ka bynta ba ki wei ki shnong ruh kin bud nuksa namar nalor ki jingma kiba ap ïaki shnong ki thaw, kumba long mynta wat ka jingmyntoi ba dei ban ioh ki trai muluk la hap ban ïasam lang bad ki, bad kan sa poi ka por ba kitei ki bar jylla ki don ruh ka bor wat ban pynkylla ïaka saiñ hima sima.
Ka seng ka la pynkynmaw ruh ïa ki jingjia ha ki snem ba la leit noh ka jingshah jrong kti jong kawei ka longkmie ha u bar jylla bad u ba la phet krad noh bad jah klep syndon naka thaiñ bad haba don kum kine ki jingjia mano ban bah khlieh ka seng kala buh jingkylli.
Namakata shuwa ban jia kaei kaei kaba sniew naka liang ka seng kala kyrpad ïaki nongïalam shnong ba dei maki ban peitngor ïaki shnong ki thaw ban nym ailad ïa ki briew ba nabar ban wan bsuh khlieh haki shnong ki thaw.