Tang 12 ngut na ka 1000 kiba ïohkam sorkar, shaei ka lawei ki samla?

Nongpoh, Naitung 04: Ki nongïalam ka seng Congress na Ri-Bhoi District mynta ka sngi kila ther ïaka sorkar BJP kaba la lamkhmat ha Ri India halor ka kyrduh kam kyrduh jam, ka jingduh mynsiem ki samla pule watla kila pyndep ïaki jingpule ki bapher bapher.
Haba kren sha ki lad pathai khubor mynta ka sngi ha Nongpoh, u Bah CB Syiem u ba dei u Adhoc President ka Ri-Bhoi District Congress Committee, haka jingdonlang ki dkhot ka party u la ong ba kum ki nongïalam ka party ha Ri-Bhoi District ki dap da ka jingsngewkhia kaba jur halor ka jingnang hiar ka pule ka puthi, ka iohkam iohjam ki samla, watla ki khun samla haka jylla bad ka ri ki leit ban pyntbit bad pule haki lain bapher bapher bad pynlut ruh da ki phew lakh haki jingpule pynban haba ki leit ban thep kam tang 12 naka 1000 ki ban ioh.
U la ong ruh ba na ka liang u Rahul Gandhi kum uwei naki nongïalam haka seng Congress u la tur sha Gujarat ban kren halor ki mat bapher bapher ba ïadei bad ka jingeh ki samla kum ka jinglait tuh ki jingkylli NEET, ka jingpyndam ïaki eksamination ba dei ban ïakhun, ka jingpynslem haka thungkam bad ka jingjur ka jingbym iohkam iohjam ki samla.
U la ong ruh ba ki don shibun ki eksam bapher bapher kum ka NEET, JEE, SSC, UPSC, Railway Recruitment bad haba kheiñ kyllum ka jingsiew pisa ki samla ban thep naka bynta ban ioh ïakhun eksam kala long kaba shyrkhei bad poi da ki lakh klur, hynrei kaba sngewsih ka long ba tang khyndiat eh ki samla kiba iohkam katba bad katei ka pisa ka dei tang ka jingmyntoi sha ka sorkar katba ka jingsyrtok bad ka jingtim ïaki samla thep kam.
Kumta ka seng congress ka khot ka wer ïaki khun samla na Ri-Bhoi bad na ka jylla ba kin mih shakhmat ban shlur ka mynsiem ban ïakhun ïaka hok namar ka sorkar ka leh bym salia ïaka jingeh bad ka jingïakhun ki samla haka ri bad ka jylla bad kin mih ban ai jingmut bad ka seng Congress kan pdiang ïa kine ki jingai jingmut khnang ba ki samla kin nym long langknia, naka bynta ka bit ka biang lang baroh namar ka seng congress ka don ïaka thong ban sei ki nongïalam naka bynta ban nym ktah ïaka jinglut jingsep ki samla ba kan nym don ka jinglute naki longiing longsem bad ban pynbeit thymmai ïaka rukom treikam haka pule puthi bad ka iohkam iohjam.