Shillong, Rymphang 21: U Nongïalam ka Congress na Rajasthan uba la ju bat teng ruh kum u myntri ha ka sorkar pdeng u Sachin Pilot ha ka sngi Ba-ar u la ong ba ki kam kiba ka sorkar synrop MDA ba la thaw bad saiñdur da ka BJP ka la pheil lut ha baroh ki liang la ha kaba ïadei ka ïohkam ïoh jam, ka roi ka kiew, ka jingpynbiang ïa ki jaka pule bad kiwei de ki jingdonkam ki paidbah jong ka jylla.
Haba kren sha ki lad pathai khubor u Pilot u ong ba ki kam kiba ka BJP ka leh ki la paw pyrthei lut plaiñ ha ka jylla ba ka la pheil lut ban pynurlong hynrei ka heh tang ki kyntien jingkular.
“Ki kam ka BJP ki la paw lut mynta na kaei kaba la jia ha Meghalaya. Ki don ha ka bor ha Delhi bad kumjuh ki don ha ka bor ruh ha ka jylla Meghalaya hynrei kiei ki maw khang lynti ïa ka ban pynurlong ïa kata ka kular ban leh da kata ka sorkar
ar enjin (double engine government),” u la ong.
Haba kren halor ka ïohkam ïohjam ki samla u la ong, “Kaei ka daw ba ka BJP kam pynurlong ïa ki kular ba thiang ba ka la khlei sha ki paidbah ka jylla ha u 2018, balei kam lah ban pynmih ki lyngkha ai kam aijam kiba thymmai ne ki karkhana thymmai ha Meghalaya?”
“Lada phi peit ïa ka kular jong ka NPP bad BJP ki la kular ban pynmih shibun bah ki kam na bynta ki samla hynrei balei kam pynurlong haba ka don ha ka bor, namarkata ki paidbah kim dei ban khmih lynti ba ki kular ba ka khlei mynta kam pynurlong lada ha u 2018 kam pat pynurlong eiei” u la ong.
U la ong ba ka BJP lada peit na ki kam kiba ka la leh ka kren shai ba ka thong jong ka ka dei ban don beit ha ka bor da sa kumno kumno ruh, “Hynrei nga shaniah skhem ba ki paidbah ka jylla kin ai ka juab da ka jingstad ha ka 27 Rymphang,” u la bynrap.
Shuh shuh u la kam ba lada peit na ki kular bad ki kam kiba ka Congress ka leh haba ka thaw sorkar ka ju pynurlong ïa ki mat kular kiba ka khlei sha u paidbah ka jylla.
“Ki dei ki dur khmat kiba thymmai bad kiba dang suba bad nga sngew skhem ba ki paidbah kin jied da ka jingstad namar kum ka party ngi la ailad ïa ki samla ban ïakhun na ka party ngi sngew skhem ruh ba ki paidbah kin pynjop ïa ki,” u la ong.
U la ong ruh ba ka Congress ka ju pynleit jingmut ban pynkupbor ïa ki samla ym tang ha ka jylla hynrei ha ka ri hi baroh kawei da kaba ka sdang ïa ki skul pule bad ki shlem ai jinghikai ïa ki samla da kaba u ai nuksa ïa ka jingsdang ïa ka Indian Institute of Management (IIM), ka National Institute of Fashion Technology (NIFT) bad ka North Eastern Indira Gandhi Regional Institute of Medical Sciences (NEIGRIHMS).
Haba kren halor ka pule puthi u Pilot u la ong ba ka dei ka mat kaba donkam ka jingpynleit jingmut namar ka la shah ieh khunswet ha kane ka sorkar kaba mynta bad ong ruh ba ka Gross Enrolment Ratio ha u 2019-20 ka jingdon kiba dang sdang ban leit skul ka kham don hapoh ban ïa kiwei ki jylla ha North-East.
“Ngin sdang ïa ka skulbah jong ka sorkar jylla da kaba pynleit jingmut ruh ha ki laiñ jingpule ba lah ban aikam aijam,” u la ong.
Ha kane ka sngi u Pilot u la leit ruh ban shim bynta ha ka jingïalang jong u kyrtong ka Congress u Bah JA Lyngdoh ha Khyndai lad ban pan jingkyrshan na ki paidbah nongshong shnong kane ka kyntoit jong ka North Shillong Constitunecy.
