Ka Mawkynrew ka la ïohi jingkylla ha ki san snem ba la dep, ngan dang bteng ban shakri : Banteidor Lyngdoh

Shillong, Rymphang 21: U Bah Banteidor Lyngdoh, u la pynkhreh ban shah jied biang kum u MLA ka Mawkynrew ha kane ka elekshon MLA 2023 ka ban long ha ka 27 tarik mynta u bnai, u la ong ba ki kam kiba u la trei ha ki san snem ba la dep ki kham kren jam ban ïa ki ktien jong u bad um artatien eiei ba ki paidbah ka Constituency kin dang ka jingshaniah ha u.
Haba kren ha ka jingïalang ïalap elekshon na ka bynta jong u ba la khot pynlong da ka People’s Democratic Front (PDF) Jatah Circle ha shnong Jatah ha ka 20 tarik u Rymphang, 2023, u Bah Banteidor u la ong, “Ki jingkylla ki la wan ha ki san snem ba la dep lyngba ka jingïatreilang bad phi ki paidbah bad ngam don jingartatien ba ma phi hi phin ai biang ha nga ïa ka kam kum u nongïalam jong phi”.
Da kaba pynpaw ba ki kam ban kyntiew ïa ka roi ka par naduh ki surok, ki jingkyntiew kyrdan ïa ki jaka sumar, ka jingwanrah ïa ki skhim um bam, ki madan ïalehkai bad kiwei pat, u la ong, “Nga khlem ieh ïa ka Constituency naduh ba phi la pynjop ïa nga bad nga don hajan bad ki paidbah la ka long ka pang ka shitom ne kino kino ki jingdonkam”.
Halor kiba ïakhun pyrshah, u la ong ba um don eiei ban ong ïa ki namar ka jingïakhun jong u ka long pyrshah ïa ki jingeh kiba ki paidbah ki ïa kynduh. “Nga la trei san snem bad phi la bishar kumno ka long ka man jong ka Constituency, ngi la kiew ha bun ki liang bad ai ïa nga ban bteng ka jingshakri ban pyndep ïa ki kam kiba dang sah”.
U la ong ba kum u briew ym lah ban biang lut hynrei ki don ki jingduna hangne hangtai bad kiba ïaleh pyrshah ki wad daw wad dong na kum kita namar kim donlad da kumwei pat. “Baroh ki ong ba nga la leh bha bad kim don lad da kumwei ban kynthoh hynrei ka shong eh ha phi ki nongshong shnong ka Mawkynrew bad ki nongkyrshan ban ai ïa ka rai ha ka 27 tarik”, u la ong.
“Ha ki san snem kum u MLA bad kum u Myntri nga la wanrah bun ki kam pynroi la ka long ha ka surok, ki lynti syngkien, ka um bam, ki skul pule, ki lad jingsumar, ki madan ïalehkai, ki jaka ai jinghikai ha liang ka kam rep, ki jingïarap na ka skhim MLA sha ki riewshimet, ki seng samla, ki seng longkmie, ki kynhun tem bad rwai tynrai ha ka thain, ki kynhun ïalehkai, ki kam jngohkai pyrthei bad terter kiwei pat ki kam”, u la ong.
U la ong ba ma u bad ka iing naduh ka kurim ki don jingïatreilang bad kloi ki kti ban kner sha ki paidbah nongshong shnong kiba don ha ka jingeh jingjynjar bad ka pang ka shitom. “Wat hapdeng ka jingpynthut na ka khlam COVID-19 pynban ngam shym la randien ban wanrah ïa ki lad ki lynti ban leh ïa ki kam ban pynmyntoi ïa ki nongshong shnong ka thain”, u la ong.
U la ong ba ha ka jingdon jong kum u Myntri ha ka la mynjur pyntreikam ïa ka Sports Policy bad Youth Policy ha ka Jylla ka ban long ka jingmyntoi ïa ki khun samla ka Jylla. “Nga la shim ïa ka sienjam ba ka Sorkar Jylla kan pynlong ïa ka lympung ïalehkai Meghalaya Games ka bym ju kham pynlong shuh da ki snem bad ka lympung 2nd North Eastern Olympics Games kaba jop”, u la ong.
Ha kane ka sngi la wan ban ai jingkren da ki nongkyrshan bad nongïalam ka PDF Zonal Committee Mawkynrew Constituency ba kynthup ïa u Bah Dengbok Kurkalang, u Bah Dikos Lymba, ki nongkitkam ka PDF Central Executive Committee ba kynthup ïa u Bah James Ban Basaïawmoit, u bah Elezar Chyne nalor kiwei pat.