Shillong, Lber, 10: U Nongïalam jong ka All India Trinamool Congress u Mukul Sangma uba dei ruh u Myntri Rangbah barim ka jylla u la takrain tyngeh ïa ka Congress kaba la pynbna ban pynieng kyrtong na ki ar tylli ki Lok Sabha Seat ha Meghalaya.
U Mukul u la kynthoh ruh ïa ka jingkren jong u Jairam Ramesh ba ka Trinamool Congress kam shym la ap hynrei ka la ïaid beit shakhmat ban pynbna ïa ki kyrtong ha ki 42 tylli ki Seat ha ka jylla West Bengal.
“Ngi la ap la slem bad nga ngeit ba baroh ki ïohi bad ka ri baroh kawei ka peit ïa ngi bad ap da ka jingïaishah. Ka la don ka jingthmu ban sei tang uwei u kyrtong na ka INDIA Bloc ban pynthikna ba ngin ïatreilang kum kawei ka kynhun hynrei kane kam shym la urlong satia,” la ong u Mukul ha ka sngi u Blei.
“Mynta lada ka Congress ka ong ba ka TMC kam ap bad ka la ïaid shakhmat ban pynbna ïa ki 42 ngut ki kyrtong ha West Bengal, nga ngeit ba ngin hap ban pynkynmaw ïa ka jingshisha ba ka Congress kam shym la shim ïa ka rai bad kaei kaba la ïakut,” u la ong.
Da kaba pynpaw ba ka Congress ka la pyndkut ïa ka jingïateh, u Sangma u la ong, “kam long kaba shisha ba ki la ïaid shakhmat bad ban pynbna ïa ki kyrtong na ka bynta ka Meghalaya. Ha Meghalaya, ki don tang ar tylli ki Seat. Na ki ar tylli, ka Congress ka ladep ïaid shakhmat ban pynbna la ki jong ki kyrtong.”
