Da ka Bus ïa ka Holy Cross HS School, ka iing skul ïa ka Mawkynrew Presbyterian – Aiti u Bah Banteidor

By Mawphor News Desk On Mar 11, 2024

Shillong, Lber 10 : Kum ka jingnoh synñiang ryngkat ka jingthmu ba ka pule puthi ha ka thaiñ Mawkynrew kan kiew sha khmat, u Bah Banteidor Lyngdoh, MLA ka Mawkynrew Constituency ha kajuh ka sngi kata ha ka ka 08 tarik u Lber, 2024 u la leit ban aiti ïa ka bus kit khynnah skul sha ka Holy Cross Higher Secondary School bad plie ïa ka ïing skul ba thymmai jong ka Mawkynrew Presbyterian School.
ïa kane ka bus skul u MLA u la pynïoh ha ka mang tyngka kaba long 10 lak tyngka katba ka iing skul pat ka dei kaba la shna na ka mang tyngka jong ka Special Rural Work Programme (SRWP) 2022-2023 kaba long 8 lak.
Ha ka jingïalang aiti ïa ka bus skul la ïa donlang da ki bor pynïaid ka Holy Cross Higher Secondary School, ki nongïalam ka Balang Katholik, ki khynnah skul nalor kiwei pat. Ka skul ha ryngkat ka jingsngew kmen ka la pynlong ia ka prokram kum ki jingai jingkren khublei ïa u MLA na ka liang ki bor pynïaid skul bad ki jingrwai jingshad na ki khynnah.
U MLA ha kane ka jingïalang haba kren kum u kongsan u la pynbna ban ai sa 10 lak tyngka ka jingïarap pisa na ka bynta ban pynheh ïa ka ïing skul kumba la ïamir jingmut bad ki bor pynïaid skul.
Katba ha ka jingïalang plie ïa ka ïing skul ba thymmai jong ka Mawkynrew Presbyterian School, la ïa donlang da ki bor pynïaid kane ka skul, ki nongïalam shnong nalor ki nonghikai bad ki khynnah skul.
Nalor kane ka jingplie ïa kane ka ïing skul ba thymmai, u Bah Banteidor u la kular ba un peit bniah ïa ki jingdonkam ban nang pynbha shuh shuh ïa kane ka skul.
Ka phang jingkren u Bah Banteidor na kine ar tylli ki jingïalang ka long halor ka jingangnud jong u ban kyntiew ïa ka pule puthi ha kaba u la ong, “Ka Literacy Rate ka la kiew bha haba nujor bad kiwei pat ki snem ba la dep”.
U la ong ba na ki jingnoh synñiang kiba u la noh sha ki skul ha ka Constituency hi bunsien kam ju long lehnohei bad kumta u ïohi bad ïai kyntu ban don ka jingïatreilang na ka por sha ka por ban kyntiew ïa ka thaiñ ha ki liang baroh.