T. 3000 kawei ka longkmie, kawei ka kam na kawei ka longïing, kular ka Seng Congress

Shillong, Rymphang 09: Hadien ka jingkular ka Trinamool Congress ban pynïoh skhim shi hajar tyngka ïa kawei ka longkmie na kawei ka ïing, mynta pat sa ka Seng Congress ka la kular ba lada ka wan ha ka bor kan ai ka skhim kaba 3000 tyngka sha kawei ka longkmie na kawei ka longïing baduk.
U Bah Vincent H. Pala, President ka Meghalaya Pradesh Congress Committee (MPCC) haba ïakren bad ki nongthoh khubor hadien ka jingïalang ban pyllait paidbah ïa ki san tylli ki mat ba thymmai jong ka jingïaleh elekshon, u la ong ba ka Seng ka la pyrkhat bha halor ka jinglong duk ki ïing ki sem, khamtam eh ki ki ïing ki sem kiba don tang ka longkmie marwei, ka la buh kane ka jingpyrkhat bad ka la tyrwa ïa kane sha ka Seng ha Delhi bad ka Seng na Delhi ka la pdiang ïa kane. Kumta kane ka mat thymmai kan sa rung ruh ha ka Manifesto jong ka Seng ha kane ka elekshon.
“Ka Congress ka la pyrkhat khia bha ïa kane bad ngi sngewkmen ba ka Seng kmie na Delhi ka la pdiang ïa kane ka jingtyrwa”, la ong u Bah Pala, u ban ïakhun ïa kane ka elekshon na Sutnga- Saipung Constituency, East Jaiñtia Hills District.
Kawei pat ka mat ïaleh elekshon ha jylla ha kane ka kynti la ong u Bah Pala kan dei ka jingaikam aijam ïa uwei u dkhot jong kawei kawei ka longïing ha ka jylla. U la ong ba ïa kane la leh na ka bynta ban weng ïa ka jingkyrduh kam kyrduh jam ha ka jylla kaba la nang jur katba nang mih ki sngi. “Kadei ka kamram jong ka sorkar ban aikam aijam ïa ki samla ne ki nongshongshnong”, la ong u MP ka Shillong sha Lok Sabha.
Shuh shuh u President ka Congress ryngkat ka jingïadon lang kiwei pat ki nongïalam na Delhi kiba dei peit ïa ka Meghalaya, u la ong ba ka Seng ka la rai ruh ban ïakhun ban pyllait ïa ka jylla na ka jingbamsap, namar ka jingbamsap mynta kam don tang ha ka sorkar, ha ki nongmihkhmat hynrei ka la hiar ruh sha ki paidbah ha kaba ki paidbah ki la shim pisa wat ban leit thep vote ruh. “Ngin pynlong ïa ka Meghalaya kaba lait na ka jingbamsap”, la ong u Bah Pala.
Kawei pat ka mat ba ka Congress ka la kular ban pynmih bording kumba 500 Megawatt ka bording elektrik ha kine ki san snem khnang ba ka jylla kan lait na ka jingduna bording. U Bah Pala, u la ong ba ka jylla ka lah ban leh ïa kane namar ka don ki bor ka mariang kiba ka lah ban ïoh ïa kane ka jingdonkam ka bording elektrik.
Ka mat kaba san, kaba kynthup ha ka Five Star Point, la ong u Bah Pala ka long ban ïaleh pyrshah ïa ka jingwan hiar thma u drok na Bangladesh, Nepal bad kiwei kiwei de ki jaka. Ban ïaleh pyrshah ïa kane ka Seng kan pynmih bun ki Counselling bad Rehabilitation Centre.