Shillong, K’lyngkot, 31: Ki samla pule kiba thmu ban applai ïa ka Scholarship ne ka baibam ki la ïa kynduh ïa ka jingeh bakhraw namarba ki hap ban ieng laiñ da ki kynta tang ban ïoh thied ïa ka E-Stamp namar ka jingduna ki jaka ban die ïa kine ki E-Stamp.
Ka Batesi TV, ha ka sngi Balang ka la sakhi ïa ka jjingbun briew ha ophis treikam jong ka Deputy Commissoner jong ka East Khasi Hills District kiba la sdang ban ieng laiñ naduh ka por 9:00 baje mynstep tang ban ïoh kloi wat lada ka ophis ka plie ha ka por 10:00 baje mynstep.
Haba pyrshang ban ïakren bad kiba bun ki samla hynrei ki kyntait ban ïakren halor kane ka jingeh ba ki ïakynduh. Kane ka jingieng laiñ da ki kynta ka la pynlong ïa kiba bun ki samla pule ban duh klass noh bad don ruh kiba la shu phet jyndat.
Haba ïakren bad uwei na ki samla u la ïathuh naduh ba la pyntreikam ïa kane ka E-Stamp ki la ïa kynduh jingeh namarba duna palat ki jaka ba die ïa kane ka E-Stamp bad kumta u la kyntu ïa ka Sorkar ba kan plie lad ban buh bun tylli ki jaka khnang ba kan pynduhnong ïa ki samla kiba aplai ïa ka Scholarship.
