Shillong, K’lyngkot, 31: Ki Pulit ka East Garo Hills ki la pynlong ïa ka jingkhynra ha ka khlaw barben jong ka Bolkinggre, East Garo Hills, hadien ka jinglap ïa kawei ka tiar ba phylla.
Ki Pulit ki la pynlong ka jingkhynra kaba jur hadien ba ki la ïoh jingtip ba kawei ka Parachute ka la hap na suin bneng bad kawei ka tiar ba phylla ba don bad ka song. Mar mar ki Pulit ki la pynlong ïa ka jingtohkit halor kane.
U Superintendent of Police ka East Garo Hills Bah S.A Rynjah ha u kyrwoh ba la phah sha ki lad pathai khubor u la pyntip ba ha ka 30 tarik, Kyllalyngkot, 2024 ha ka por kumba 9:00 baje mynmiet ki Pulit ka Bolkinggre OGC halor ka jinglap ïa kawei ka tiar ba phylla ha ka shnong Asiragre kaba hap hapoh ka Williamnagar Police Station.
Mar mar la pynlong ïa ka jingtohkit ha kaba ka kynhun BDDS ka la leit mar mar sha ka jaka ba la buh ïa kane ka tiar ba phylla.
Ha ka jingtohkit, la sngewthuh ba ha ka 29 tarik, Kylllalyngkot, 2024 ha ka por kumba 6:30 baje janmiet, uwei u briew uba la tip kyrteng kum u Silnang R. Marak na ka shnong Asiragre u la lap ïa u tiar uba la tip kum u “meteomodem PS-20 ba la shna ha ri France ba la pyndait ha kawei ka Parachute rong saw ka la hap ha ka phyllaw iing jong u. Une u rangbah u la shim noh ïa kane ka tiar ban buh noh hapoh ka ing lajong.
Ïa kane ka tiar la kurup noh da ki Pulit bad la rah sha OGC na ka bynta ban leh ïa kaba donkam.
U SP u la ïathuh shuh shuh ba u PS-20 u dei u GPS ba la shna na ka bynta ban thew ïa ka lyer.
