Iaroh u CM ïa ka jingnoh synñiang ki Salesian ban kyntiew ïa ki samla

Shillong, K’Lyngkot 31: I Heprit Ellery Kharkongor I la ïoh ban rah ïa ka nam lahduh jong ka Sur Kynud Season 2 kaba la pynhap pyrda ha ka janmiet sngi Balang ha Don Bosco Youth Centre, Laitumkhrah Shillong.
Kane ka grand finale kadei ruh artad ha ka sngi khraw jong u Don Bosco kaba ju rakhe man ka 31 tarik u Kyllalyngkot.
Ïa kane ka lympung ïa kob rwai la wan ban pynhap pyrda da u Myntri Rangbah ka Jylla Conrad K Sangma kum u Kongsan ryngkat ka jingdon lang u Vice Provincial nangta u Economer Fr. James Thyrniang, Fr. Primus Syiem nalor kiwei kiwei ki riewniam bad ki kmie ki kpa bad bahaiing jong ki nongïashim bynta.
Ha kane ka grand finale kaba la pynbit pynbiang da ka Don Bosco Media Tv Network hapoh ka jingïalam jong u Fr. Michael Makri kum u Director, ki la don haduh 10 ngut ki samla kiba la poi sha ka kylla ba khatduh ban ïa knieh ïa ka song pisa kaba 1lak tyngka.
Naduh kaba sdang na ka liang ka DBMNTV lyngba ki coach ba la buh kyrpang ba kynthup ïa i Kong Lapdiang bad samla Kheiñkor, ki ai ruh ka jinghikai ban pynjanai ïa ka sap jong kitei ki heprit bad ki samla kiba wan aireng ha katei ka lympung.
Shwa kane na ka liang u Myntri Rangbah haba kren ha ka jingïalang u la ai ka jingïaroh kaba khraw ïa ki bor pynïaid jong ka Sur Kynud da kaba ong ba kino kino ki kam ba ki riewniam Salesian ki leh kadei kaba janai khamtam lei lei haba ïadei bad ki samla.
U la ong ruh ba wat u kpa jong u, u (L) PA Sangma Myntri Rangbah barim ka jylla bad Lamphang barim ha Lok Sabha u dei u soh jong ki riewniam Salesian.
Ha kajuh ka por u la ai ruh ka jingïaroh ïa ka Don Dosco Youth Centre kaba la lah ban pynlong ïa katei ka rynsan ïakob rwai kaba shongkhia.
“Dei lyngba kum kine ki jingïakob la ka long ha kino kino ki lympung kiba pynlong ïa ki samla ban trei shitom ba kin poi sha ka thong,” u la ong.
Na ka liang u Vice Provincial pat u la ong ba ka sienjam ba shim da ka DBMN ban pynlong ïa katei ka lympung ïakob ka ïahap bha ha ka sngi khraw jong u Don Bosco uba ka thong treikam kadei na bynta ki samla. “Nga ïaroh ïa ki bor pynïaid kiba pynlong kum kine ki lympung jong ki samla da ka thong ban kyntiew ïa ka sap jong ki,” u la ong.
Lah ruh ban kdew hangne ba ïa ka kyrdan kaba ar ha katei ka lympung la ïoh da i Arlene Ïawphniaw bad ïa ka kyrdan kaba lai pat da i Gwyneth Mawthoh.
Ha kane ka sngi la sam ruh ïa ka Cecilia Memorial Award sha i Brother Banteilang Lyngdoh bad kumjuh ruh ïa ka DBMNTV Youth Icon Award 2023 sha i samla Dapalei Warjri nalor ki syrnod sha ki samla pule jong ka Don Bosco Youth Centre.
Ïa kane ka lympung ïakob rwai la treilang ruh bad ka Ophis u Mawphor kum ka Media Partner.