Shillong, K’lyngkot, 31: Ka kynhun jong ki nongïalam ka BJP, kaba kynthup ïa ka President ka Mahila Morcha na Meghalaya, Sikkim, Nagaland bad na kiwei kiwei ki Jylla ka thaiñ Shatei Lammihngi ki la leit jngoh ïa i Kong Silbi Passah iba la shah jied ban ïoh pdiang ïa ka khusnam Padma Shree bad pynkup burom ruh ïa i.
La synran lang ïa kine ki nongïalam ka Mahila Morcha da u Chief Spokesperson jong ka State BJP u Bah Mariahom Khrakrang bad u State Vice President u Gagan Jain lem bad ki dkhot ka Party.
Ha u kyrwoh ba la phah sha ki lad pathai khubor, ka BJP ka la ong pynpaw ba kane ka jingïoh khusnam jong i Kong Silbi Passah ka long ka long sa uwei pat u mawmer ban ithuh ïa u synniang u bynhei sha ka rwai ka siaw bad ka put ka tem.
Ha ka jingïaid lynti kaba jrong, i Kong Silbi i la ïoh pdiang ïa ka khusnam Sangeet Natak Akademi, nangta, ka khusnam Indian Chamber of Commerce for Affirmative Action Front- Liners, ka khusnam Prasar Bharati bad ka Meghalaya Day Award.
Na ka liang jong u Bah Mariahom Kharkrang haba ai jingkren ha ka jingïalang ba lyngkot, u la ong, “da ki snem i Kong Silbi i la khring ïa ki paidbah da ki sur jingrwai tynrai. Dei tang ka Sorkar jong u Narendra Modi kaba la ithuh ïa u synniang u bynhei ban pynkup burom da ka khusnam Padmashree. Kane ka jingai jingïathuh khatduh ïawai ka la nang pynriewspah shuh shuh ïa ka put ka tem ha ka rynsan jong ka ri bad kaba pynpaw ba dei tang ka Sorkar BJP kaba lah ban rah ïa ka Jylla Meghalaya shajrong.”
Ka President jong ka Meghalaya BJP Mahila Morcha ka Kong Susuki Pariat ka la ong, “i Kong Silbi Passah i la long ka jingsarong ïa ka thaiñ Shatei Lammihngi baroh kawei. Nga ai khublei ïa ka Sorkar u Modi kaba ai jingithuh ïa ka jingtrei shitom jong ka kynthei riewlum na ka jylla Meghalaya.”
